The Definitive Guide to Living in the Capital , Cairo , Egypt

عروض كتير بتطلع طول السنة، لكن عرض واحد ناس كتير بتستناه ويمكن كمان بتحوشله، هو العرض الخاص بعيد ميلاد كارفور، ده بخلاف العروض اللي بيقدمها المول وفروعه طول السنة، نقطة تميز كبيرة خدها المول ده بالذات فيما يتعلق بالأجهزة الكهربائية، وخصوصًا التلفزيونات، و شوية أجهزة تانية.

تخفضيات كبيرة وكم أجهزة أكبر بيخلي الناس تقطع مشاوير كبيرة لحد الفرع الرئيسي في المعادي، يستحملوا الزحمة، وضيق النفس، والتدافع عشان يلحقوا التخفيضات العبقرية، لكن قصاد الوجه المشرق لكارفور، في وجه مظلم جدًا ناس كتير ماتعرفهوش إلا اللي واجهوا مشاكل مع الأجهزة اللي اشتروها، واضطروا يرجعوا للفرع و يتعاملوا مع خدمة العملاء، لذلك وعشان تجربة التسوق من هناك تمر بسلام قررنا نقولك شوية نصائح من ذهب للتعامل مع كارفور بأمان.

اتفرج بتأني وخلي معاك انترنت

وسط الزحمة والمعروضات الكتير جدًا، الواحد بيبقى مشتت، سيبك من كل ده خالص لو ناوي تجيب جهاز أنت محتاجه.. لازم تنسى الزحمة وتنسى كل الحاجات اللي هتعكنن عليك، أول ما تدخل اتفرج بتأني شديد، واعرف أنت ماشي إزاي، قسم المكان بصريًا لمناطق وخليك حريص إنك تكون عديت عليها كلها عشان مايفوتكش حاجة، ويُفضل يكون معاك مجلة العروض هتلاقيها وأنت داخل في ستاند على اليمين.

مهم جدًا إنك تتفرج كويس وبتأني وتكون انطباعات، والأهم يكون معاك إنترنت على الموبايل، عشان تقدر تقارن سعر الحاجة اللي أنت هتشتريها بسعرها بره، أسهل مكان هيكون محدد الأسعار جوميا أو سوق دوت كوم، ساعتها هاتقدر تعرف التخفيض حقيقي أو لا، والمسألة تستحق الخوض في الزحمة ولا ملهاش لازمة.

خد معاك ورقة وقلم

اتفرجت بالراحة و خدت لفة ؟ وإنت بتعمل ده في إيدك ورقة وقلم بتكتب فيها الأجهزة اللي عاجباك، وسعرها جمبها بالراحة، لأنك مسافة ما هتتحرك من مكان لمكان هتنسى سعر الحاجة اللي أنت سيبتها وراك،  لو مشيت بالطريقة دي مش هتحتاج تفضل رايح جاي، المطلوب في الورقة تكتب النوع والسعر والانطباع.

قارن بهدوء شديد

خلصت لفتك وكتبت ورقتك، في مكان رايق جدًا وليكن بره الزحمة خالص اقعد بهدوء وركز في الأسعار مقارنة بالماركات وإمكاناتك المادية واختار بالراحة، ولما تاخد قرار هتلاقي نفسك مرتاح، مش حاسس إن في حاجة لسة ماشوفتهاش ولا إن في حاجة فايتاك، هتبقى اخترت عن بينة، في اللحظة دي ارجع خد بصة على اللي اخترته هاتحس انه فعلًا افضل اختيار بالنسبة لك، هنا بقى ابتدي خد إجراءات الشراء.

الفاتورة ثم الفاتورة ثم الفاتورة

وأنت بتشتري لازم تكون عارف إن الفاتورة أهم من بطاقتك الشخصية نفسها، لأن أي مشكلة في الجهاز في غياب الفاتورة أنت كده لبست في الحيطة، أسطورة إن الناس هتراجع الكاميرات وتثبت أنك اشتريت أو يطلعلوك واحدة بدالها مش حقيقية، اتمسك بالفاتورة أكتر من الجهاز نفسه، بص عليها كويس، اعرف فاتورتك هتكون منفصلة ولا هتكون عبارة عن الريسيت اللي بيطلع من كاشير كارفور، لأن دي خدعة تانية ناس كتير بتتعرضلها لما تشتري جهاز ويعتقدوا إن الريسيت الرفيع اللي بيديهولك الكاشير مالهوش لازمة وهوب مع أول مشكلة في الجهاز يكتشفوا إن هو ده كان الفاتورة اللي على أساسه يسري الضمان! إصحى للفاتورة ليغفلوك

راجع الضمان واختمه .. وراجع نفسك

أنت رايح تشتري، مش وراك حاجة غير الشراء والتركيز في تفاصيله، وسط الزحمة والخنقة، ركز، لو الضمان محتاج ختم اختمه، والأهم إنك بعد ما تطمن على الضمان تراجع حاجتك، وأنت جوه منطقة الشراء، خاصة لو شاري أكتر من حاجة، أحيانًا لخمتنا في الضمان بتخلينا ننسى نراجع الحاجات اللي معانا، الأجزاء الداخلية للجهاز يعني لو خلاط، الشفرات موجودة؟ الأجزاء كاملة؟ راجع حاجتك كويس محدش هيراجع وراك أبدًا.

الأهم إنك لما تراجع تكون جوه منطقة الشراء لأنك لو خرجت خطوتين بره بالفاتورة والحاجة، عامل الأمن هيعتبر محاولة دخولك تاني عشان تجيب حاجة ناقصاك محاولة شراء جديدة، حصلت معانا ونسينا جهاز جوه وإحنا ملخومين في ختم الفاتورة من خدمة العملاء ورفضوا إننا ناخده!

لما تجيب تلفزيون بلاش الحامل أو باقي المشتملات

صحيح العروض كويسة جدًا، لكن هم في النهاية تجار، واللي بيديهولك باليمين، هايرجع ياخده بالشمال، لو ركزت شوية هاتلاقي في العروض التلفزيون، لكن وأنت بتشتريه هيعرض عليك الحامل اللي على الحيطة، هتشتريه على طريقة “الشيء لزوم الشيء” فتكتشف إنه أربع أضعاف تمنه بره !

لذلك نصحيتنا ليك ماتشتريش غير الشيء اللي أنت داخل تجيبه، ماتجيبش حاجة زيادة في الزحمة باستعجال، إلا لو أنت متأكد إن تمنها تمام وإنك محتاج تجيبها فعلًا.

هات ماركة مضمونة مجربها

خلينا نكون صرحاء، مافيش حاجة مضمونة نهائيًا، لكن مايضرش لو حاولنا إننا نكون حريصين شوية، قدام عينينا في كارفور كانت أكتر المشاكل اللي جاية لخدمة العملاء بسبب أجهزة نوعيتها مش مشهورة والتخفيض عليها كان كبير، الناس كانت جاية تشتكي مر الشكوى وطبعًا معظم المشاكل ماتحلتش لأن الضمان في البطاطا وكارفور مالهوش دعوى وعلى الزبون المتضرر اللجوء لله.

لذلك نصحيتنا ليكم اشتروا ماركات معروفة، جربتوها قبل كده وعارفين الصيانة شكلها إيه، حتى لو كانت سيئة، المهم تكون موجودة من الأساس.

تلاشي التعامل مع خدمة العملاء

كل اللي كتبناه فوق ده علشان ماتجيش عليك اللحظة السوداء وتتعامل مع خدمة عملاء كارفور، تكشيرة، تجاهل، أحيانا توبيخ، كل دا هتشوفه من خدمة عملاء هي أبعد ما تكون عن الخدمة أو معرفة الطريقة المثلى للتعامل مع العملاء، للأسف ده رأي اتكون من تعاملات كتير جدًا هناك.. وللأسف ماحدش بياخد حق ولا باطل لذلك، حاول ماتوصلش لمرحلة إنك تتعامل مع خدمة عملاء كارفور، زحمة، مشاكل ما بتتحلش، تسويح، ويبقى الوضع على ما هو عليه حتى لو وقفت تصرخ بسببهم في وسط المول ودي حصلت قدامنا!

الكارثة إننا في أحد المشاكل اللي مرينا بيها هناك حاولنا نقابل حد من الإدارة فاتقال لينا لا مافيش قدامكم غير خدمة العملاء، يعني منك ليهم ومنهم ليك ومافيش حاجة هتتحل، تلاشاهم واعتبرهم مش موجودين إلا لو هاتختم فاتورة.

جرب الحاجة على طول سواء في المكان أو لما تروح

سواء عروسة جديدة، أو حد عادي، لازم تستخدموا الحاجة أول ما تروحوا، جربوها كويس وسيبوها شغالة فترة محترمة، خاصة لو هتخزنوها بعد كده، لأن لو بعد فترة طويلة اكتشفتوا مشكلة هتشيلوا الليلة من الألف للياء.

اشتري في أضيق الحدود

التخفيضات شيء جميل، والتوفير حاجة مهمة جدًا، لكن كمان لازم نفتكر إن مافيش حاجة لله أو ببلاش، مرواح كارفور هيكلف بنزين كتير لو مش من سكان المعادي، وهيكلف زحمة ووقت وضيق نفس، وحرقة أعصاب لو واجهت مشكلة مع الجهاز اللي بتشتريه، كل ده ليه تمن، لذلك بننصحك ماتروحش كارفور إلا لو كان فعلًا العرض يستاهل وإنت محتاج الفارق المادي من التخفيض المعلن، ده بعد ما تتأكد إن التخفيض حقيقي فعلًا، ماتجريش وخلاص لأن خدع التسويق كتير وأنت بس اللي هتدفع التمن في النهاية.