The Definitive Guide to Living in the Capital , Cairo , Egypt

آخر جمعة من شهر نوفمبر كل عام بيطلق عليها “الجمعة السوداء”، أو “البلاك فرايداي”، واللي تم تحويلها لجملة “وايت فرايداي” لأسباب لها علاقة بثقافة المجتمع المصري، لكن الهدف واحد وهو تقديم خصومات كبيرة للمستهلكين، وعلشان أهمية اليوم ده اللي بيكون فيه خصومات فوق العادة، هنقول لكم على دليل للتسوق في اليوم ده للحصول على أفضل العروض والمنتجات.

 

1- لازم تعملوا قائمة بالاحتياجات، وبلاش تشتروا حاجات كتير لمجرد أن عليها خصم من غير احتياج ليها.

2- فيه بعض المواقع والشركات بتبدأ موسم الخصومات بتاع البلاك فرايداي من أول شهر نوفمبر، طبعًا ده شيء جميل وأكيد فيه عروض لطيفة، ولكن ماتستعجلوش وبلاش تجروا على خصومات مكتوبة لأن كل لما اليوم ده بيقرب كل لما تكون المنافسة بين الشركات كبيرة والخصومات بتكون كبيرة فعلًا.

3- الشراء من بره مصر لطيف جدًا والخصومات ممتازة خاصة في ظروف الركود العالمي الحالي، ولكن خلي بالكم مش معنى انكم اشتريتوا قطعة ما بـ100 جنيه مثلًا وهي تمنها 1000 يبقى أنتم كسبانين، لأنكم هتدفعوا جمارك مش قليلة.

4- لو كنتم مجهزين قائمة وعاملين حسابكم على منتجات محددة تشتروها لازم تبقوا عارفين أقل سعر للمنتج ده إيه، كمثال لو هتشتروا غسالة سعرها في السوق 5000 جنيه، وهتلاقوها في أماكن مختلفة بـ4500 جنيه، لازم تكونوا كاتبين السعر الأقل في قائمتكم، علشان ماتلاقوش شركة ما منزلة سعر الغسالة 8000 جنيه وبعد الخصم 4500 جنيه، فده إعلان خادع.

5- دوروا على المنتجات والماركات اللي الريفيو بتاعها من العملاء مميز وأهم حاجة “الجودة – خدمة العملاء”، علشان تقدروا تستفيدوا بجد من البلاك فرايداي.

6- لو هتشتروا ملابس داخلية أو منتجات تجميل خلوا بالكم أنها غير قابلة للاستبدال والاسترجاع لأسباب صحية، حيث أنها قابلة لنقل العدوى في حالة الاستخدام حتى لو الاستخدام ده كان للتجربة بس، فالأفضل تشتروا الحاجات دي من محلات مباشرة علشان ميبقاش فيه ريسك عليكم.

7- أوعوا تنخدعوا بالاعلانات البراقة واشتروا بعقلكم واحسبوها صح علشان تقدروا تعرفوا هل فيه استفادة من العرض ولا هو وهمي.

8- تابعوا جروبات الفيسبوك وتليجرام المتخصصة في التسوق والعروض، علشان هما بيوصلهم العروض دي للتسويق ليها قبل ما تنزلكم كمستهلكين.

9- تابعوا صفحات أشهر المواقع في المنطقة بتاعتكم علشان تقدروا تعرفوا المنتجات هتنزل امتى والخصومات هتكون من امتى وده هيسهل عليكم كتير.

10- يفضل لو هتتسوقوا في عروض البلاك فرايداي يكون التسوق عن طريق الكاش، علشان لو التسوق بكريدت كارد للأسف مش هتحسوا بالمصاريف وممكن الميزانية تفلت منكم، والأفضل كمان تحددوا ميزانية واضحة لكل منتج، ولو أنتم متابعين للسوق يبقى تحددوا متوسط سعر كتوقع علشان تحسبوا ميزانيتكم اللي هتكون طبعًا قابلة للزيادة والنقصان.

11- دي أشهر المواقع للتسوق أونلاين كل اللي عليكم تضغطوا على الاسم فهيوديكم للموقع مباشرة “أمازون – جوميا – نون – رنين – العربي – Rushbrush – كايرو سيلز – بي تك – هومز مارت  – 2B – شاومي.

وأخيرًا..

استمتعوا بالعروض والخصومات اللي هتفيدكم وماتنسوش أن احتياجكم الحقيقي هو أساس اختياركم، وبنتمنى لكم تسوق ممتع وعروض مميزة.