The Definitive Guide to Living in the Capital , Cairo , Egypt

تأثيث منزل عصري في الوقت ده، أمر مرهق في ظل ارتفاع الأسعار، وده اللي بيخلي كتير مننا بيتراجع عن حاجات كتير نفسه فيها، وكمان بيأثر على تجديد المكان بتاعنا وتطويره واللي بالمناسبة مهم جدًا لراحتنا النفسية، وعلشان مهمتنا إننا ندور ونبحث ونشوف حلول، هنقول لكم في المقال ده على 5 أماكن مصرية 100% بتبيع الأثاث المنزلي بالتقسيط، وبحسب تقرير نشرته نشرة إنتربرايز، فالأماكن دي عندها تصميمات مختلفة، وتقدروا كمان تطلبوا من عندهم تصميمات مخصوص حسب ذوقكم.

بوهوم

بتنفرد بتقديم الأثاث البسيط والأنيق، فلو أنتوا عاوزين تفرشوا بيتكم زي أجواء سيناء والبساطة والشياكة فده أكتر مكان هيعجبكم لأن المنتجات عندهم بتتصنع من خشب معاد تصنيعه والبامبو هاند ميد، والأسعار عندهم تبدأ من 250 جنيه وحتى 10 آلاف جنيه ومتاح عندهم أنظمة تقسيط.

تقدروا تعرفوا أكتر عنهم من خلال موقعهم الإلكتروني من هنا.

 

ريك راك

الشركة دي بتقدم رفاهيات الأثاث والاستخدام المتعدد لمنتجات كتير، مثلًا تقدروا تشتروا من عندهم أريكة بتتحول سرير أو تتقسم كرسيين، وكمان بيوفروا كل اللي يحتاجه البيت من أثاث داخلي وخارجي ومستلزمات الحيوانات وغيرها، والأسعار عندهم بتبدأ من 185 جنيه للإكسسوارات وبتوصل لحد 42 ألف جنيه، وكمان بيقسطوا.

تقدروا تعرفوا أكتر عنهم من خلال موقعهم الإلكتروني من هنا.

شيك هومز

ده بقى متجر متكامل فيه كل اللي أنتم محتاجينه لتأثيث أي منزل مهما كان حجمه، وبيوفروا خدمة “الواقع المعزز” علشان تعاينوا المنتجات اللي عاوزين تشتروها وتعرفوا هتكون مناسبة ولا لأ، ده غير أنهم بيعملوا تصميمات خاصة، وأسعارهم بتبدأ من 100 جنيه وحتى 56 ألف جنيه.

تقدروا تعرفوا أكتر عنهم من خلال موقعهم الإلكتروني من هنا.

 

لا كاسا

من الشركات اللي بتوفر أثاث منزلي عصري وبأسعار مناسبة بتبدأ من 35 جنيه وبتوصل لحد 32 ألف جنيه، وعندهم طرق تقسيط كتير جدًا وكمان استبدال نقاط شركات المحمول وبيدوا خصم 5% على الشراء بالديبيت كارد.

تقدروا تعرفوا أكتر عنهم من خلال موقعهم الإلكتروني من هنا.

 

فرشة

تصميمات “فرشة” بتوفر لكم لمسة جمال وراحة مختلفة بإبداع وأناقة منفردة، والأسعار عندهم تتراوح  ما بين 900 حتى 25 ألف جنيه، وماتنسوش أنكم تقدروا تقسطوا عن طريق البنوك إللي بتتعاملوا معاها.

تقدروا تعرفوا أكتر عنهم من خلال موقعهم الإلكتروني من هنا.