The Definitive Guide to Living in the Capital , Cairo , Egypt

رنا شرف

الصورة الرئيسية: Mina Rad on Unsplash

رمضان 2026 على الأبواب، ومع أول نسمة روحانيات بنبدأ نفكر في تفاصيله الحلوة: اللمة، السفرة، واليوم اللي ما يكملش من غير ياميش رمضان. من أول أسبوع، السفرة بتبقى عامرة، والياميش بيكون نجمها الأساسي. عشان كده جمعنالك أشهر وأضمن أماكن تشتري منها ياميش رمضان في مصر، من البراندات الكبيرة لحد الاختيارات الاقتصادية، علشان تختار اللي يناسب ذوقك وميزانيتك وتستقبل الشهر الكريم وأنت مطمئن.

أماكن تشتري منها أحلى ياميش رمضان 2026

أبو عوف

واحد من أقوى البراندات في السوق، واسم ثابت في ياميش رمضان. عنده كل الأصناف الأساسية زي المشمشية، القراصيا، الزبيب، وقمر الدين. أسعار قمر الدين بتبدأ من حوالي 95 جنيه، وده سعر مناسب مقارنة بالجودة. أبو عوف متوفر في أغلب السوبر ماركت، وكمان له فروع خاصة.

سعودي ماركت

اسم تقيل في عالم المكسرات، ووجوده في ياميش رمضان بقى مضمون. هتلاقي عنده كل الأنواع، غير العصاير الطبيعية اللي بيقدمها زي السوبيا والتمر الهندي، بعصيرات فريش وطعمها ثابت كل سنة.

بنده ماركت

من السوبر ماركت المعروفة بعروضها، وده اللي بيخليه اختيار كويس للي عاوز يشتري ياميش رمضان بأسعار معقولة. الأصناف متنوعة، والخصومات بتفرق خصوصا لو بتجهز سفرة كبيرة.

العثيم

سوبر ماركت له اسمه وشهرته، وأسعاره في المتناول. العثيم بيقدم تشكيلة كبيرة من ياميش رمضان، وده بيخليك تخلص كل مشترياتك في مكان واحد من غير لف كتير.

العبد

ماينفعش ييجي رمضان ومنذكرش العبد. الاسم الأشهر في الحلويات موجود بقوة في ياميش رمضان كمان. عنده منتجات باسمه ومنتجات تانية متنوعة، بأسعار بتبدأ من الاقتصادية وتوصل للفاخرة، حسب ميزانيتك واختياراتك.

قويدر

اسم كبير في الحلويات، ومشارك مميز في ياميش رمضان. قويدر بيقدم علب ياميش جاهزة بجودة عالية، أسعارها بتبدأ من حوالي 1600 جنيه، وبتضم مكسرات، زبيب، ولفة قمر الدين، مناسبة للهدايا أو السفرة التقيلة.

اختيارات اقتصادية

لو بتدور على ياميش رمضان بسعر أوفر، معارض أهلا رمضان، ومناطق زي السيدة زينب والأسواق الشعبية هتلاقي فيها اختيارات كتير. الجودة موجودة، والأسعار أقل، بس محتاجة شوية تركيز وانتقاء.