The Definitive Guide to Living in the Capital , Cairo , Egypt

لو بتدور على أحلى زبادي للسحور في القاهرة، سواء زبادي بلدي أو منتجات ألبان طازة تكمل سفرتك في رمضان 2026، جمعنا لك قائمة بأشهر وأفضل أماكن الألبان اللي ممكن تشتري منها أفضل زيادي، خصوصًا وإنه مش بس وجبة أساسية على سفرة السحور، لكنه كمان اختيار ذكي بيساعدك تحس بالشبع والراحة خلال الصيام. وفي السطور الجاية هتلاقي ترشيحات متنوعة في مدينة نصر، والمعادي، وأكتوبر، والسيدة زينب، والتجمع، والمقطم.. علشان تختار الأقرب ليك والأسهل في المشوار قبل الفجر.

في البداية خلونا نتفق إن الزبادي هو ملك السحور، وده يمكن لإنه بسيط وصادق، بيدي إحساس بالراحة، وخفيف على المعدة، وبيكمل أي سحور سواء مع عيش بلدي أو جنب طبق فول. والزبادي البلدي له جمهور كبير، وناس كتير ما تقدرش تنهي سهرتها من غيره في رمضان.

تعالى نلف سوا على 10 أماكن بيقدموا زبادي طازة ومنتجات ألبان تستاهل التجربة.

ريماس لاند

لو عاوز زبادي بلدي أصلي وطعم لبن صافي بجد، ريماس لاند اختيار مضمون. عنده تشكيلة كبيرة من منتجات الألبان، وأشهر فروعه في مدينة نصر.

لبن العصفور

في السيدة زينب هتلاقي المحل الصغير اللي الناس كلها بتتكلم عنه. زبادي بلدي بطعم زمان، بسيط لكن مميز.

صافي

اسم معروف في عالم الألبان والحلويات. غير الزبادي، عنده منتجات ألبان وحاجات كتير تكمل سفرتك. من أشهر فروعه التجمع.

الأصدقاء

اسم كبير في منتجات الألبان والحلويات زي الكسترد والجيلي. الزبادي عنده ثابت الجودة، ومن أشهر فروعه أكتوبر.

المالكي

مشهور بأرز بلبن أسطوري، لكن الزبادي عنده كمان له جمهور خاص. من أشهر فروعه مصر الجديدة.

زاهر

مكان معروف بمنتجات الألبان الطازة وطعم اللبن الواضح. من أشهر فروعه المقطم.

أولاد أحمد ندا

اللي ماجربش أم علي هناك فاته كتير، لكن الزبادي برضه يجنن. من أشهر فروعه المعادي.

المدينة المنورة

اسم كبير في عالم الألبان، وعنده عصائر رمضانية زي السوبيا. الزبادي عنده مميز، وأشهر فروعه المعادي.

سارة البطة

من الأماكن اللي ليها جمهور ثابت، ومنتجات الألبان عنده طازة وطعمها حلو. من أشهر فروعه أكتوبر.

ما يفوتكش كمان: أماكن سحور رمضان 2026 في القاهرة حسب منطقتك | 20 ترشيح لعشاق السهر حتى الفجر

الكرنك

مشهور برز بلبن على كنافة على بسبوسة، لكن ما تستهونش بالزبادي هناك. من أشهر فروعه السيدة زينب.

وأخيرًا..

سواء بتحب الزبادي البلدي أو الجاهز، القاهرة مليانة اختيارات تناسب كل ذوق وكل منطقة. أهم حاجة تختار مكان مضمون وطازة علشان سحورك يبقى خفيف ومريح.