The Definitive Guide to Living in the Capital , Cairo , Egypt

مع قرب الكريسماس، القاهرة بتحتفل بطريقتها الخاصة. أنوار في الشوارع، زينة في البيوت، وإحساس بالبهجة بيملأ الجو. وشجرة الكريسماس تفضل دايمًا البطلة الأساسية في الاحتفال، مهما اختلف حجمها أو شكلها. علشان كده، جمعنالك دليل بسيط وعملي بأماكن بيع شجر الكريسماس في القاهرة، من الأرخص للأفخم، ومن الشوارع الشعبية لحد المولات والأونلاين.

درب البرابرة في العتبة

لو بتدور على سعر معقول ومش عاوز تدخل في تكاليف كبيرة، العتبة هي أول اختيار. في درب البرابرة هتلاقي شجر كريسماس بكل الأحجام، ومعاها كل لوازم الزينة والإضاءة. الأسعار هنا أقل بكتير من المولات، ونصيحة مجربة إنك تشتري من المحلات اللي جوه الشوارع مش اللي على الواجهة، الفرق في السعر واضح.

النزهة

منطقة النزهة الجديدة بقت من الأماكن المعروفة ببيع شجر الكريسماس والزينة بتاعة السنة الجديدة. هتلاقي تنوع كبير في الأحجام والأشكال، وأسعار مناسبة، وكمان عندهم بيع جملة وقطاعي، وده بيخليها اختيار كويس للعائلات أو اللي عاوز يشتري أكتر من قطعة.

شبرا وشارع خلوصي

شبرا وشارع خلوصي تحديدًا فيهم تشكيلة واسعة من ديكورات الكريسماس. شجر بأطوال مختلفة، زينة، إضاءة، وكل التفاصيل اللي ممكن تكمل شكل الشجرة. المكان مناسب للي عاوز يلف ويقارن بين أكتر من محل قبل ما يشتري.

روكسي والكوربة

في مصر الجديدة، تحديدًا روكسي والكوربة، هتلاقي محلات ومكتبات كتير بتبيع شجر الكريسماس. المميز هنا مش بس الشجرة، لكن كمان تنوع مستلزماتها من زينة وأضواء، بالإضافة لهدايا بسيطة للكريسماس زي الأقلام، الكوفيات، البالونات، وحاجات لطيفة تناسب الأطفال والكبار. الأسعار متفاوتة وبتناسب أذواق مختلفة.

الزمالك

الزمالك من المناطق اللي دايمًا بتقدم اختيارات متنوعة. شجر كريسماس بأشكال وأحجام مختلفة موجودة في محلات ومكتبات كتير، والأسعار بتختلف حسب الجودة والتصميم. المكان مناسب للي بيدور على شكل مميز أو تصميم مختلف عن المعتاد.

سيتي ستارز

صعب تدخل مول كبير زي سيتي ستارز ومتحسش بالكريسماس. هناك هتلاقي شجر الكريسماس بكل أشكاله، ومعاه هدايا، ألعاب، زينة، وإكسسوارات. الأسعار أعلى نسبيًا، لكن الاختيارات كتير ومناسبة للي عاوز يشتري كل حاجة من مكان واحد.

شراء شجرة الكريسماس أونلاين 2026

لو مش حابب الزحمة أو مفيش وقت للنزول، الشراء أونلاين حل عملي. مواقع زي أمازون، جوميا، نون بتوفر شجر كريسماس بأحجام وأسعار مختلفة وجودات متنوعة، مع توصيل لحد البيت.

وأخيرًا..

سواء هتشتري شجرة كبيرة أو صغيرة، بسيطة أو مليانة زينة، الأهم إن الكريسماس يكون مناسبة للفرحة ولمّة حلوة. كل سنة وأنتم طيبين.