The Definitive Guide to Living in the Capital , Cairo , Egypt

مافيش أجمل من الفترة اللي كنا بنستخدم فيها الجوابات في المراسلة، ومافيش أجمل من منظر ساعي البريد وهو واقف أمام بيتنا وبينده علينا علشان نستلم جواب من حبايبنا، ومافيش أقيم من أنكم تهادوا شخص عزيز ظرف جوابات عليه الطوابع وجواه مشاعر حقيقية مكتوبة على ورق الجوابات بتاع زمان.. لكن لو نفسكم الزمن يرجع من تاني، مشروع “Hendy Made” الفني، عمل فكرة حلوة لعشاق القديم.

مي جمال هندي، هي صاحبة مشروع “Hendy Made” الفني، وهي خريجة كلية هندسة قسم عمارة، ورغم أن مجال الدراسة مش مرتبط بشغلها ده إلا أن حب الديكور والفنون خلى هدفها تعمل براند مختلف تمامًا، وبتعتمد فيه بشكل أساسي على الأسمنت، وأنها كمان تعمل جوابات كلاسيكية وشمع وبوكس بتتصنع مخصوص بأشكال مختلفة.

فكرة الجوابات اللي بتعملها مي بتكون عن طريق الورق المعتق، وهي بتعتقه بنفسها وبتطبعه كمان حسب الرسائل المكتوبة، وده بيرجعنا لزمن الجوابات المميز اللي بعيد عن السوشيال ميديا والتكنولوجيا الحديثة، واللي اختفى حاليًا من حياتنا، وسعره يبدأ من 7 جنيه وبيوصل حتى 25 جنيه.

مي بتعمل كمان شموع فنية مميزة، بتجيب خاماتها من شركات التكرير وبتخلطها وتصبها وتلونها وتعطرها علشان تكون شموع مميزة لكل شخص ويبدأ سعر الشمعة من 60 جنيه وبيوصل لـ150 جنيه، وطبعًا كله هاند ميد.

أول منتج لمي كان شمعة وجواب هدية لحد قريب منها، لأنها بتقدر أي حاجة مكتوبة بخط الإيد وخصوصًا لو مصنوعة هاند ميد، وبسبب رد الفعل الكويس من الناس اتجرأت وأخدت خطوة أنها تشتغل في إعادة إحياء الجوابات من تاني، وبعدها بدأت تعمل شموع فنية، ثم بدأت تتوسع وتعمل ديكورات بشكل مختلف عن طريق مادة الأسمنت.

هدف مي الفترة دي إنها توصل لأكبر عدد من الناس علشان يستخدموا الجوابات الورقية، والهدايا الهاند ميد، لأنها بتعتبرها أصدق من وجهة نظرها.

تقدروا تطلبوا كل اللي محتاجينه من مي وتعرفوا أكتر عن مشروعها الفني من خلال صفحة الفيسبوك من هنا.