The Definitive Guide to Living in the Capital , Cairo , Egypt

التورته دايمًا من الحلويات اللي موجودة في كل المناسبات الحلوة، وخاصة في أعياد الميلاد والزواج، ولكن لما التورته تكون بشكل ولون وخامات مميزة بتفرق كتير في الفرحة مهما كانت صغيرة، وده اللي بيعمله جروب Lolita Cakes وصاحبته دعاء اللي قررت تعمل تورتات وحلويات هتحس فيها بطعم دفء البيوت.

خلال السطور الجاية هنقولكم على كل اللي محتاجين تعرفوه عن “دعاء” ومشروعها.

دعاء شلبي، كانت مشهورة وسط أصحابها بأنها أشطر طباخة، وكانت دايمًا بتعمل أكل حلو ومميز، وفي العزومات كانت هي البريمو بتاعهم، سواء في الطبخ أو الحلويات، وكان أصدقائها بيطلبوا منها دايمًا تعمل أكل أو حلو لهم بشكل ودي، لحد ما أقنعتها صديقة ليها أنها تحول الحب والشغف في الأكل لمشروع، ومن هنا جت فكرة إنها تعمل جروب على فيسبوك للحلويات تقدر من خلاله تمارس شغفها وتعمل بيزنس هي شاطرة فيه وبتحبه.

وعلى الرغم من أن “دعاء” زوجة وأم لطفلين إلى أنها أخدت الخطوة، ورغم أن الخوف كان متمكن منها لأنها كانت حاسة أن المسئولية كبيرة، ولكن دعم ومساندة أصحابها وأهلها، وعلى رأسهم “علاء” زوجها كان هو الوقود الحقيقي اللي نور المشروع وخلاه يظهر للنور ويكمل، وبدأت “دعاء” تعمل أحلى منتجات كيك، وده ظهر مع الريفيوهات اللي الناس بدأت تحطها وتتكلم عن جمال الحلويات والخامات وصبرها وشغفها واهتمامها بكل تفصيلة بداية من الطلب حتى توصيل الأوردر للعملاء بنفسها.

بتقول دعاء إن جروب Lolita Cakes بيعمل مقاسين من التورتة بشكل ستاندرد 18 و22 سم، وطبعًا فيه سبيشيال أوردر بيكون متاح، ويفضل تطلبوا الأوردر قبل المناسبة بأسبوع أو 5 أيام، لأن المكونات بتيجي مخصوص لكم ومن أجود الأنواع، وبتضيف إنها بتقدر تعمل منتجات كتير تانية زي الكب كيك والتشيز كيك وغيرها، والأسعار بتبدأ من 300 جنيه، وأسعار التوصيل بتختلف حسب المنطقة والمسافة.

تقدروا تعرفوا أكتر عن جروب Lolita Cakes من خلال الفيسبوك من هنا.