The Definitive Guide to Living in the Capital , Cairo , Egypt

الإكسسوارات البناتي، أو زي ما ناس كتير بتسميها “الإكسيسوريز”، هي فن بديع بيخلق حالة جميلة بين اللي لابساه وبين القطعة نفسها. لأنها ببساطة بتكون معمولة هاند ميد بحب وروح، من فكرة خاصة أو تصميم مستوحى من حاجة بتلمس القلب.

النهارده هنتكلم عن تجربة مختلفة في عالم الإكسسوارات. توليفة فريدة بين التصميمات الهندية والمصرية، بخامات متنوعة، عملتها المصممة سالي رمضان علشان كل قطعة عندها تكون فيها حكاية واحساس.

رحلة سالي بدأت سنة 2014 بدافع حبها للمشغولات الهاند ميد والفن اليدوي. بدأت وسط أهلها وأصحابها، وهي مؤمنة إن كل قطعة بتعملها فيها طاقة وفرحة وذكرى حلوة.

ومع الوقت سالي بدأت تتوسع، وتشارك في معارض مختلفة، وكمان مدارس انترناشيونال علشان تعرض شغلها اللي بيمتاز بالتفاصيل الدقيقة. من هنا بدأت تتحول من هاوية لمُصممة محترفة، وأطلقت براند “Sally Accessories”، واللي هدفه التعبير عن الأنوثة والبهجة والتميز.

وفي 2019، دخلت مرحلة أكبر من التطور والتعلم. خدت دورات في كلية الفنون التطبيقية، وتعلمت فنون التصميم والتلوين على الخامات الطبيعية. وكمان اتدربت في ورشة نحاس في منطقة الصالحية بالحسين، وده اداها خبرة واسعة وأسرار الصناعة اليدوية.

تصميمات سالي دلوقتي بتمزج بين الأحجار الكريمة، النحاس المطلي دهب وفضة، والإكسسوارات الخشبية المطبوعة يدويًا. وكل خامة ليها روحها. وعلشان كل قطعة بتتعمل يدوي، فهي بتقدّم كمان خدمة تنفيذ حسب الطلب من 3 لـ7 أيام حسب التصميم. الأسعار بتبدأ من 50 جنيه وبتوصل لـ2000 جنيه.

سالي عندها أكتر من كوليكشن مميز. زي كوليكشن الخشب الملون اللي صممته على جزأين: الأول بخامات طبيعية، والتاني بطباعة يدويًا، وألوانه مستوحاة من كيب تاون وفرحة أسوان ودفئها.

وفي كوليكشن تاني مستوحى من الطراز الهندي، تحديدًا قصر ميسور بألوانه الغنية وفخامته. أما أكتر كوليكشن عليه طلب فهو الأحجار، وبتستخدم فيه المرجان، الفيروز، واللولي، علشان يعبّر عن النعومة والأناقة.

إبداع سالي وصل إنها عملت تاج مطلي بماء الذهب للفنان خالد الصاوي في مسلسل “جت سليمة”، وظهرت بعدها في برامج مختلفة. وكمان الفنانة الكبيرة إسعاد يونس لبست من تصميماتها في برنامجها “صاحبة السعادة”.

لو حابين تعرفوا وتتابعوا شغل سالي أكتر، هتلاقوا كل التفاصيل على صفحتها على فيسبوك هنا.