The Definitive Guide to Living in the Capital , Cairo , Egypt

كأنك فتحت كتاب سحري فيه حكايات قديمة وقررت تقراه للمرة الخمسين بنفس انبهارك وشغفك، ده كان إحساسنا وإحنا بنشوف نظرات الفنانين اللي في الإعلان الخاص بالنجم الراحل أحمد زكي السنة دي، حسينا إننا جزء من الصورة مش مجرد متفرجين عليها، و لأول مرة نصدق كل ردود أفعال الفنانين في عمل فني، ده حصل لما شوفنا شكل يسرا وأحمد حلمي ومنى زكي وعمرو سعد وهما بيتفرجوا على مشاهد من سينما أحمد زكي، مكنش مجرد فيديو أو إعلان.

 

قبل الكلام عن فنيات الإعلان وصوت شيرين اللي أضاف كتير، سألنا نفسنا ليه الإعلان طالع بالشكل ده وإزاي صدقنا ردود أفعال الناس دي كدة رغم إنهم مش دايمًا بيتصدقوا في أعمالهم الفنية؟

افتكرنا موقف زمان حصل لما مرة المخرج عاطف الطيب وبعد شغله مع نور الشريف وأحمد زكي اتسأل عن الفرق بين الاتنين، قال وقتها “نور ممثل مكتمل، لما اختاره في أي دور بيمنحني الأداء اللي بحلم بيه، لكن أحمد زكي بيمنحني أبعد من اللي أنا عاوزه بكتير”.

وقتها ناس كتير قالت أكيد هيحصل وقيعة بين نور وزكي لكن المفاجأة لما نور قال “إذا كان تقييمى كممثل هو 7 من 10،  أحمد زكى أكيد سيحصل على 10 من 10″، هنا الإجابة بالتأكيد هي كمية الحب وحالة الصدق اللي نقلها الراجل ده، مش بس لجمهوره، لزمايله من داخل الوسط الفني وعلشان كدة شوفنا الحالة اللي أبهرتنا، وزي ما أحمد زكي قال في أحد لقاءاته ” الشيء الأكثر ضرورية في حياتي هو الحب”.

 

 

الإعلان راح لأكتر مكان أحمد زكي كان بيحبه “السينما”، ومش أي سينما، دي سينما مترو وسط البلد، السينما اللي شهدت نجاحات وصولات أحمد زكي في “زوجة رجل مهم” و”ناصر ٥٦”، واللي استني قدامها الشباب عشان يشوفوا زكي وهو بيجسد “حسن هدهد” في فيلم ” كابوريا”، وبعدها قلدوا قصة شعره اللي بقت موضة بعد الفيلم، عرفنا إن الصور اللي موجودة جوة الإعلان من تصميم الفنان “آدم عبد الغفار”، مصمم وفنان مصري شاب قدر بعشقه لأحمد زكي إنه يقدم أفيشات وصور مبهرة على مدخل سينما مترو.

 

 

قدر المخرج تامر محسن مخرج الإعلان إنه يحول فنانين كتير منهم شارك زكي في أعماله وغيرهم اتعلموا منه لجمهور بيتفرج، ومنهم اللي بيشوف صور جمعتهم بيه، من أمتع الحاجات جوة الفيديو هو القطع السريع على ردود أفعال الفنانين على مشاهد لاحمد زكي، اختيار الناس اللي شاركت كمان كان موفق جدًا.

يسرا معروفة بحبها الكبير لزكي واشتغلوا سوا أكتر من مرة في أفلام، منها، الراعي والنساء، ونزوة، منى زكي كان هو من أهم أسباب نجاحها لما شاركته فيلم أيام السادات واضحك الصورة تطلع حلوة، و الفنانة وفاء سالم اللي شاركته بطولة فيلم النمر الأسود، وشيرين رضا اللي شاركته فيلم نزوة، الفنان عبد العزيز مخيون اللي قدم دور مهم جدًا معاه في فيلم الهروب.

وعمرو سعد اللي طول الوقت بيؤكد انه من مدرسة أحمد زكي التمثيلية حتى لو اختياراته مابتقولش كدة أحيانًا، أحمد حلمي اللي أعلن أكتر من مرة عن عشقه لأحمد زكي، وطبعًا صوت شيرين والموسيقي اللي في الفيديو هي الحاجة الأكثر جمالًا بعد مشاهد وصور أحمد زكي جوة الإعلان، مرة شيرين قالت “أحمد زكي هو فتى أحلامي الأول وكنت بعشقه”، الحقيقة دي أحلى حاجة قدمتها شيرين في آخر كام سنة، سواء من حيث الأداء أو الكلمات فهي أجمل حاجة ممكن تقدمها شيرين لفتى أحلامها.

من شاب بسيط اترفض واتهمش من كتير من المنتجين في بدايته، لأهم فنان مصري وحالة صعب تتكرر بنوثقها في فيديوهات ويتعمل عنها مليون إعلان، أحمد زكي اللي عايش بأفلامه جوا قلوبنا.