أورانج واتصالات وفودافون: حرب إعلانات شبكات المحمول في رمضان
أورانج إعلانات رمضان اتصالات دنيا سمير غانم رمضان 2018 سميرة سعيد علي الحجار فودافون محمد رمضان محمد منير هند صبري
Mohamed Hamdy
رمضان بيمثل حالة طوارئ بالنسبة لعالم صناعة الإعلانات في مصر، والسبب هو سلسلة الإعلانات اللي بيتم إنتاجها مخصوص لصالح الشهر الكريم، في محاولة لاستغلال حب الناس لمشاهدة المسلسلات والبرامج الرمضانية.
لكن اللي بنلاحظه كل سنة عن السنة اللي قبلها هو اختلاف الفلسفة من وراء الإعلانات، خاصة إعلانات شركات الاتصالات واللي اتغيرت من بداية تأسيس الشركات دي ولحد النهارده، والسر في تغير الفلسفة دي هو تغير طبيعة المنتج نفسه على مر الوقت. تعالوا نشرح لكم الموضوع ده بشكل مبسط علشان نعرف نرصد تغير الإعلانات الخاصة بشركات المحمول في مصر.
مع بداية تأسيس شركات المحمول ودخول خدمة الهواتف المحمولة في مصر، طبيعة الخدمة كانت جديدة ومختلفة على الناس. ومن هنا بدأت الإعلانات تخدم سياسة الشركات أيامها وهي تشجيع الناس على استعمال المحمول، وإنهم يكلموا بعض من خلاله، وتعليمهم طريقة تركيب الخط وشحن الرصيد من خلال كروت الشحن وغيرها من الخدمات الأساسية اللي كانت غريبة ومختلفة على الناس.
لكن المرحلة اللي بنعيشها دلوقتي، هي الفترة اللي شركات المحمول حققت انتشارها في المجتمع بالكامل، وأصبح من السهل على أي مستخدم في مصر أنه يستعمل الشريحة الخاصة به بسهولة، حتى أن الشركات أصبحت مش مهتمة بعرض خدماتها بقدر اهتمامها بتسويق اسمها بشكل جيد وأنها تعكس فكرة (إحنا شركة غنية ومعانا فلوس كتير) طوال الوقت من خلال الاستعانة بأكبر النجوم لعمل الإعلانات ومحاولة اختيار أفكار جديدة ومجنونة.
أورانج: عرض مكرر وموسيقى مقتبسة
أورانج واحدة من شركات الاتصالات اللي جمعت مجموعة كبيرة من النجوم زي هند صبري ومحمد منير ودنيا سمير غانم وغيرهم من خلال إعلان (جاري يا جاري) وهو عرض مكرر سبق وقدمته شركة فودافون رمضان اللي فات تحت أسم (كارت العيلة). موسيقى الإعلان مقتبسة من فيلم شمس الزناتي لكن ظهور محمد منير في نهاية الإعلان كان مميز رغم انه نال كتير من التريقة على مواقع السوشيال ميديا.
فودافون: التركيز على الرياضة
أما فودافون فرفعت شعار جديد في إعلاناتها السنة دي، وهو أن الأولوية لنجوم المنتخب المصري اللي هيمثلونا في كأس العالم 2018 في روسيا. فكرة الحملة جديدة ومختلفة وجمعت بين نجوم السينما المعتادين وبين نجوم الرياضة بأسلوب مميز وسهل ورشيق.
لكن في رأينا أن الحملة ماقدرتش تعلق مع الجمهور بشكل جيد أو تخلق إيفيهات يتم تداولها على مواقع التواصل الأجتماعي.
اتصالات: كوميديا النجوم
المميز في إعلان اتصالات السنة دي إنه قدم مجموعة من أفضل الأصوات في مصر، زي سميرة سعيد وعلي الحجار، مع ممثلين مشهورين زي محمد رمضان.. أسماء لامعة غير مختلف عليها مع عرض قوي هو كمان.
لكن العرض بيتم الترويج له في أخر كام ثانية من الإعلان، بعد تقديم الأوبريت الاستعراضي، وده بيأكد على فكرتنا أن إعلانات رمضان الخاصة بشركات المحمول أخر أهدافها هو العروض. لكن التباهي والتأكيد على الريادة هو هدفها الأول والأخير.
مقترح
معالم وسياحة
90 دقيقة من القاهرة.. أجمل 7 أماكن في الفيوم هيغيروا موودك
أجمل أماكن الفيوم الفيوم +4
تسوق
