The Definitive Guide to Living in the Capital , Cairo , Egypt

تحسوا كده إن 2019 كانت سنة مليانة بالأفلام والمسلسلات الدرامية العالمية، والمنافسة ما بين شركات الإنتاج ومنصات المشاهدة والبث اللي زي “نتفليكس – NETFLIX” و”HBO” و”أمازون – amazon” و”Apple TV”، وعلى الرغم من إن عدد الأفلام اللي تم إنتاجها السنة دي ضخم، إلا إن المسلسلات التليفزيونية بشكل عام هتفضل هي نقطة التأثير الأقوى في الناس والمجتمع عن السينما والأفلام، وده لإنها أسرع في الوصول للبيوت والقلوب، ده غير إن انتظار الحلقات والمواسم بالأيام والأسابيع والشهور والسنين كمان هيفضل ليه طعم تاني.

خلونا نتفق إن فيه من المسلسلات دي اللي طرقع وكسر الدنيا، وفي منها اللي حقق نسب مشاهدة خرافية، وفي منها اللي طلع واختفى ومحدش سمع عنه حاجة، وعلشان كده قولنا نلحقكم قبل ما 2019 تودعنا، فجبنالكم النهارده أحسن 5 مسلسلات عالمية نزلت في 2019 حسب تقييم الناقد السينمائي “حسام فهمي” على موقع “إضاءات”:

Chernobyl:

معظمنا مش هيبقى مستغرب من إن المسلسل الأسطوري Chernobyl اللي أنتجته شبكة HBO يبقى في المركز الأول، وهو المسلسل اللي بيعيد فيه الكاتب الأمريكي “كريج مازين” مشاهد انفجار مفاعل تشيرنوبل النووي في صيف سنة 1986 والأحداث المحيطة بالانفجار بطابع وثائقي مرعب.

 

 

When they see us:

سمعنا وهنسمع اسم نتفيلكس – NETFLIX كتير خلال السنين اللي جاية، وده بسب انتاجاتها العملاقة والمبهرة واللي بجد بتخطف الأنظار والعقول والترند، واللي تقريبًا رسخت لمبدأ مهم جدًا وهو إن الدراما التليفزيونية مش بس للترفيه، ومسلسل When they see us واحد من أفضل المسلسلات اللي قدرت تشد 100 خط تحت الأهمية الاجتماعية والسياسية للدراما التليفزيونية، بقصة حقيقية لـ 5 شباب أفرو – أمريكان، هيتهموا بجريمة اغتصاب سيدة أمريكية في حديقة “سنترال بارك” وهيتحكم عليهم بالسجن 20 سنة، لكن بعد سنين طويلة من الحبس، هتظهر برائتهم، وهنكتشف مع تطور الأحداث إن السبب الرئيسي لتلفيق التهم لهم هو عنصرية المحققين ورجال الشرطة.

 

 

Mr. Robot 4:

في المرتبة الثالثة بنشوف المخرج والمؤلف المصري الأمريكي “سام إسماعيل” في الموسم الرابع والأخير وخلينا نقول كمان غير المتوقع من مسلسل  “Mr. Robot” .

الجزء الرابع لسه حلقاته بتعرض لحد النهارده على شبكة “Rotten Tomatoes” لكن سبب إضافة اسمه لقائمة “حسام فهمي” برغم إن لسه ما خلصش هو نتيجة للتقييمات المرتفعة التي وصلت للعلامة الكاملة في بعض الأحيان.

سام إسماعيل بيقدم في حلقات المسلسل ده وجبة دسمة بصريًّا وسمعيًّا وفكريًّا، حوالين صراع الشباب اللي عايش في عالم محسوب فيه وعليه كل تحركاته، ومحطوط تحت المراقبة بدون أي هامش للحرية أو المفاجآت.

 

 

Fleabag 2:

في الموسم الثاني من المسلسل البريطاني Fleabag، هنعيش مع الفنانة البريطانية “فيبي والر بريدج” اللي كتبت المسلسل وكانت بطلته في رحلة ممكن تبان كوميدية في الأول بتعاني فيها البطلة من أزمات نفسية وشخصية ورا بعضها، وهي بتحاول تلاقي معنى جديد لحياتها، بعد ما فقدت أحد أقرب الأشخاص ليها.

رحلة الفقد والاستمرار في الحياة من بعده، رحلة بتبقى مليانة بلحظات كسر وضعف، لكن البطلة في المسلسل بتكلمنا إحنا بشكل مباشر، علشان نشاركها رحلة تغيرها وانتقالها من اللحظات دي للحظات أفضل، وبالمرة احنا كمان بنغير وجهة نظرنا عن العالم كل ما بنشوفها.

 

 

Dark 2:

في المركز الخامس هنلاقي الموسم الثاني من المسلسل الألماني Dark، وبنكمل فيه رحلة الموسم الأول في معالجته لقصة مدينة ألمانية صغيرة، بتتعرض لسلسلة من حوادث اختفاء الأطفال، لكن الحكاية بتتطور علشان تبقى معقدة أكتر، وليها علاقة بإدراك البشر للزمن، والحياة، والموت.

للأسف على الرغم من إن المسلسل قوي ومبدع، إلا إنه كمعظم الإنتاجات الألمانية التليفزيونية عمومًا ما خدش حقه، لكن من ناحية تانية كل اللي هيشوفه هيبصم بالعشرة إن الألمان قدروا يقدموا دراما فيها حبكة معقدة جدًا، وممتعة جدًا برده.