الأكشن والغموض: أبطال رمضان 2016
Mohamed Hamdy
بما أننا قربنا من نهاية شهر رمضان الكريم، وبما إننا نقدر دلوقت نقول أن عندنا شبه تصور لشكل الدراما الرمضانية النهائية، مع دخول المسلسلات الرمضانية فى طورها النهائي وبداية الاستعداد لنهاية المسلسلات في اليوم الأخير من الشهر الكريم. لازم نلفت النظر لظاهرة سيطرة مسلسلات الأكشن والغموض والرعب على باقى أنماط الدراما، على العكس من مسلسلات رمضان في سنين ماضية.
لاحظنا في السباق الرمضاني السنين اللى فاتت ظهور مسلسلات زي سلسلة المسلسلات اللى قدمها الفنان يوسف الشريف زي اسم مؤقت ورقم مجهول والصياد وغيرها من المسلسلات. وفي رأينا أن نجاح الأعمال الدرامية دي شجع صناع الدراما على استكشاف تيمات جديدة كان محظور عليهم دخولها، وكانت مقتصرة على الأفلام بس، زي الأكشن والغموض والتشويق والإثارة.
القيصر
أول المسلسلات اللي بتعتمد على الأكشن والتشويق هو مسلسل القيصر من بطولة يوسف الشريف، وبيحكي عن عالم الجماعات التكفيرية والجهادية ومحاولة جهاز الأمن المصري إيقاف أحد الجماعات الأرهابية عند حدها بمساعدة شاب مجهول الهوية.
سقوط حر
مسلسل سقوط حر هو كمان يعتبر مسلسل فيه جزء كبير من الغموض والرعب النفسي من خلال قصة سيدة بتقتل زوجها وأختها وبيتم إيداعها مستشفى الأمراض العقلية للكشف على قواها العقلية بعد إكتشاف أصابتها بمرض نفسي أدى لارتكابها الجريمة الصعبة دي.
المسلسل بينضم لفئة مسلسلات الغموض وبيقدم في حلقاته الأخيرة Twist مهم مش عاوزين نحرقه على متابعي المسلسل.
الخانكة
وبما أننا بنتكلم عن الرعب النفسي، لازم نتكلم عن مسلسل الخانكة واللي بيحكي عن مدرسة بتتعرض لحادث تحرش وبتحاول تحصل على حقها فى ظل وجود ناس أصحاب نفوذ في الدولة بيحاولوا يمنعوها من الحصول على حقها.
ونوس
أما مسلسل ونوس فساب الجزء بتاع الأكشن والضرب وبيتناول عالم الرعب النفسي والفلسفة القائمة على رحلة الصراع بين الشيطان والإنسان من خلال صراع ياقوت (نبيل الحلفاوي) ضد ونوس (يحيى الفخراني) اللي بيقدم أداء هو الأفضل فى 2016 من وجهة نظرنا.
جراند أوتيل
ولسه مع محطة الغموض والإثارة مع جراند أوتيل.. المسلسل اللي بيرجع بينا للماضي وبيورينا قصة تشويق وإثارة عن محاولة شاب (عمرو يوسف) العثور على أخته المفقودة بعد حادث طردها من فندق (جراند أوتيل) فى أسوان… المسلسل بيمتاز بقدرة صناعة على خلق أحداث جديدة مثيرة جدًا وعمل Twist أكتر من مرة في السيناريو على مستوي حلقاته، الأمر اللي بيخليه مسلسل تشويق وإثارة باقتدار.
الأسطورة
بعيدًا عن الإثارة بنشوف مسلسل الأسطورة، واللي يعتبر مسلسل أكشن وضرب بأكتر من كونه مسلسل تشويق وأثارة، عن قصة أخين توأم بيحاول واحد فيهم أنه يلتحق بالنيابة، لكن السيرة السيئة للأخ التاني بتمنعه من الوصول لهدفه.
الأسطورة ممكن نعتبره المسلسل الأكثر دموية في رمضان، بمشاهد إطلاق نار واشتباك يدوي ومطاردات صعبة ومرهقة.
سبع أرواح
مسلسل سبع أرواح قدر يجمع بين الأكشن والتشويق من خلال رحلة ضابط شرطة بيحاول يوصل فيها لمجموعة من المجرمين المتورطين في إعدام رجل أعمال شهير بعد إلصاق تهمة قتل فنانة شابة به، خالد النبوي اللي بيلعب دور ضابط الشرطة بيكتشف أن رجل الأعمال اللي هو قدر بتحرياته يوصله لحبل المشنقة بريء لأن الفنانة الشابة لسه عايشة!
الميزان
الميزان اختار مدخل جديد للتشويق والإثارة من خلال عالم المحاماة والكلام عن العدالة من خلال قصة بتدور في عالم الجريمة والمحاكم وإجراءات التقاضي والقبض والتفتيش، وغيرها من أساسيات عالم المحاماه من خلال قصة المحامية غادة عادل واللي بتحاول توصل للحقيقة في أحد القضايا اللي بتتولاها.
ده كان عرض مختصر لأهم الأعمال اللي فيها أكشن وتشويق وأثارة في رمضان 2016 وزي ما إحنا شايفين الأكشن والغموض والإثارة هم المسيطرين على الأعمال الدرامية في 2016 فى عدد كبير جدًا من الأعمال الدرامية المعروضة فيها.. هل السيطرة دي هتستمر حتي رمضان 2017؟ شاركونا النقاش.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
