The Definitive Guide to Living in the Capital , Cairo , Egypt

بعيدًا عن زحمة المسلسلات وبرامج المقالب والصخب الشديد، فيه ناس بتحب تعيش الجو الروحاني الخالص في رمضان، صلاة وصوم وقرآن فقط، وإن كان ولابد فبرنامج ديني، يعينهم على حالة الاعتكاف اللي بيمارسوها لـ 30 يوم في السنة فقط، الجانب ده قنوات كتير بتهتم بيه وبتحرص على توفير برنامج ديني قوي خلال ساعات النهار، وأصبح لكل قناة نجمها، بعض الدعاة والشيوخ بيستمروا مع بعض القنوات سنوات ورا بعض، وبعضهم بيكتفي بتغيير القناة من سنة للتانية زي لعبة الكراسي الموسيقية.

حاولنا نعرف نجوم الدعوة على القنوات خلال الشهر الكريم وقدرنا نجيب لكم كل قناة هتجيب مين عشان يكون واجهتها الدينية خلال شهر رمضان في 2017.

عمرو خالد  على Mbc مصر

الداعية الإسلامي عمرو خالد بيظهر خلال شهر رمضان ببرنامج “نبي الرحمة والتسامح”، على mbc مصر، البرنامج فكرته بالكامل عن المعاملات في حياة الرسول محمد صلى الله عليه وسلم.

بيأكد عمرو خالد من خلال البرومو الخاص بالبرنامج أنه صورة النبي وحياته عاملة زي قصتنا مع المراية بعضنا بيشوفها من زاوية ضيقة حروب ومعارك مستمرة لكن لو شوفناها من كل الزوايا هنعرف أن حياة النبي رحمة وخير وحب وسلام، دور كل واحد فينا أنه يعرف يشوف حياة النبي من الزاوية الصح.

 

أحمد الشقيري على mbc

على الرغم من أن نوعية البرامج اللي بيقدمها أحمد الشقيري مانقدرش نقول عليها دينية بالمعنى الشائع، إلا إن تصنيفها وأهدافها والخلفية الثقافية لمقدمها بتحطها تحت بند البرامج الدينية بجدارة، السنة دي بييجي على نفس القناة اللي قدم من خلالها خواطره 11 سنة وقدم من بعدها قمرة 1 عشان يعيد الكرة السنة دي ويقدم البرنامج الجديد “قمرة 2017”.

البرنامج امتداد لفكرة البرنامج في السنة اللي فاتت ، عبارة عن مسابقة لتحفيز المجتمع على إبداع محتوى إعلامي إيجابي ومؤثر، البرنامج بيقوم باختيار أفضل المشاركات من كل العالم، ويسلط عليها الضوء في البرنامج اللي هيتذاع على “mbc”.

مصطفى حسني على النهار

البرنامج الديني الرئيسي لقناة النهار في رمضان 2017 هو “رسالة من الله” لمقدمه الداعية الشاب مصطفى حسني، دي مش أول سنة يظهر فيها مصطفى حسني على النهار، السنة اللي فاتت قدم برنامج “فن الحياة”.

البرنامج الجديد وظيفته تقديم إجابات مقنعة للتساؤلات اللي بيطرحها الناس عن حقيقة الأشياء وأصلها، مصطفى حسني أكد من خلال صفحته الشخصية إنه بيحاول من خلال البرنامج مساعدة الناس في تأمل رسائل الله الموجودة حواليهم في القرآن الكريم والكون، كمحاولة للارتقاء بأحوالهم الدنيوية.

القناة بجانب برنامجها الحصري لمصطفى حسني بتقدم محتوى ديني تاني زي برنامج الإعلامية دعاء عامر، وأحاديث الشيخ محمد متولي الشعراوي، وحلقات برنامج  “العلم والإيمان” للدكتور مصطفى محمود.

 الجفري والطيب وجمعة على CBC

سي بي سي لها نصيب الأسد من البرامج الدينية، قرارها واضح في إنها تضم النجوم من خلال تلات برامج أقوى من بعض أولهم برنامج “طريقنا إلى الله” للدكتور علي جمعة، مفتي الديار المصرية السابق.

البرنامج ماشي شوية في سكة المتصوفين، بيخاطب المشاهد باعتباره مريد، وبينصحه إزاي يطلب طلباته من ربنا بأدب علشان يقدر ياخد اللي هو عاوزه، القناة طلعت بيان أكدت فيه إن البرنامج بيناقش الفروق بين الخواطر والرؤى والكرامات وإزاي الإنسان ينقي ذاته وإزاي يتحلى قلبه بالقيم، ويتخلى عن الأمور القبيحة.

ثاني برنامج هو الموسم الثاني من برنامج “الإمام الطيب” للإمام الأكبر الدكتور أحمد الطيب، شيخ الجامع الأزهر، البرنامج من تقديم الإعلامي الدكتور محمد سعيد محفوظ، وبييجي في صورة محاورة مع الإمام عن قضايا شائكة، والرد على كلام عن  حقيقة التشدد في كتب التراث، وزواج القاصرات، والرد على أسئلة الملحدين، والعنف ضد المرأة، والمغالاة في المهور، وحقوق وواجبات المسلمين في المجتمعات غير المسلمة، وحقوق وواجبات غير المسلمين في المجتمعات المسلمة وهكذا.

أما ثالث برنامج فهو “الإنسانية قبل التدين”، تحت العنوان ده نشر الشيخ علي زين العابدين بن عبد الرحمن الجفري، والشهير بالحبيب علي الجفري، سلسلة مقالات طويلة في جريدة الوطن المصرية، جمعها في النهاية  في كتاب بنفس العنوان “الإنسانية قبل التدين” صدر عن دار الفقيه، وطلع في معرض الكتاب اللي اتعمل في يناير الماضي.

لكن يبدو إن الفكرة مازالت مسيطرة بقوة على الجفري لدرجة إنه قرر إن فكرة البرنامج الجديد بتاعته في  رمضان 2017 تكون بنفس العنوان وتحت نفس البنود.

بنحترم الإخلاص للفكرة والتمعن فيها والتعمق، ونتمنى إنه البرنامج يكون بنفس قوة البرامج اللي بيقدمها الجفري كل سنة واللي أوجدت له شعبية مش بسيطة عن المصريين.

النهار نور.. بداية قوية في رمضان

مجموعة النهار قررت استقبال شهر رمضان مش بس ببرنامج ديني أو حتى مجموعة برامج، ولكن بقناة كاملة أطلقت الحملة الترويجية لها بقالها فترة مش قصيرة، القناة اسمها “النهار نور” وخرج أشرف الكردى العضو المنتدب للقناة، وقال إنها في المطلق، سواء في رمضان أو غيره هتبقى دينية اجتماعية بتقدم رسالة وسطية، وواضح إنها عاملة مفاجآت زي تأكيدها على فتح أبوابها للمقرئين، وتوفيرها لمواقيت الصلاة لكل المحافظات والمناطق، بما فيها حلايب وشلاتين ورفح ده غير إذاعة صلاة التراويح على الهواء مباشرة من المدينة المنورة ومكة.

عندنا برامج دينية كتير زي”المصرى بأخلاقه” اللي بيُقدمه يوسف عادل، وبرنامج “الله يفتح عليك” اللي بيقدمه الشيخ محمود عواض، لتعليم القرآن الكريم، وبرنامج “كلام الناس” تقديم مهند السادات لمناقشة القضايا الفقهية.

 

عبد المعز والجندي على DMC

لحد اللحظة دي قناة “dmc” ما أعلنتش عن استمرار برنامج “لعلهم يفقهون” من عدمه خلال شهر رمضان الكريم، لكم الموضوع واضح من أول السنة لأن القناة عملت تعاقد مع الشيخ خالد الجندي، والدكتور رمضان عبد المعز، على تقديم برنامج “لعلهم يفقهون” لفترة مش قصيرة كمان القناة ماجابتش سيرة محتواها الديني خلال رمضان، وسواء عبد المعز أو الجندي محدش فيهم جاب سيرة ذهابه لقناة تانية لذلك نتوقع استمرار البرنامج على القناة لحين إعلان القناة عن شيء مختلف.