The Definitive Guide to Living in the Capital , Cairo , Egypt

بعد وقت قليل من عرض مسلسل (بالطو) على منصة (ووتش إت)، بدأت أراء الناس على السوشيال ميديا تُشكر في المسلسل وتتكلم عن قد إيه هو مختلف. إحنا حبينا نستنى لحد نهاية المسلسل القصير (10 حلقات) علشان نقول رأينا فيه، أو بمعنى أصح نقول لكم عن خمس أسباب تخلينا متعلقين بـقرية (طرشوخ الليف) – والأسم وهمي طبعًا- اللي بتدور فيها أحداث (بالطو) من خلال استعراض قصة طبيب بيقضي فترة تكليفه في قرية منعزلة.

 

البساطة ثم البساطة ثم البساطة

كل تفصيلة في (بالطو) بتقول إنه مصنوع بحب، ومش محطوط في الحسبان أنه يبقى الأعلى مشاهدة، مافيش بذخ إنتاجي غير مبرر، مافيش أبطال صف أول من اللي بياخدوا أجور مبالغ فيها. مافيش بطل مفتول العضلات وبطلة بارعة الجمال أو مشاهد خادشة للحياء بدون داعي.

كل حاجه في (بالطو) كانت بسيطة وده سر من أسرار نجاحه، بداية بأبطاله عصام عمر ومريم الجندي ومحمود البزاوي وعارفة عبد الرسول. كلهم ناس شبهنا مافيهمش حد خارق، ونهاية بالديكورات والموسيقى واختيار أماكن التصوير، كلها كانت حاجات بسيطة جدًا لكن تأثيرها علينا كمشاهدين كان رائع.

الكوميديا مواقف مش إيفيهات

لفترة طويلة، كانت كتير من الأعمال الكوميدية العربية بتعتمد على أن الأبطال يبقوا واقفين (مرصوصين) أمام الشاشة وكل اللي عليهم هو إنهم يقولوا مجموعة إيفيهات وقفشات كوميدية وخلاص.

لكن في (بالطو) شوفنا كوميديا معتمدة على مواقف مكتوبة حلو قوي من أحمد عاطف المؤلف، خاصة لما نعرف أن المسلسل مقتبس عن كتاب (بالطو وفانلة وتاب) اللي بيحكي فيه عاطف المؤلف عن فترة تكليفه. بالتالي إحنا بنتكلم عن كوميديا خارجة بشكل رئيسي من واحد عاصر الأحداث دي بنفسه وبيعبر عنها بطريقة كوميدية. وده بيدي للكوميديا شكل مختلف خالص عن رمي الإيفيهات اللي زهقنا منه.

 

فيه قصة ورا الكوميديا

بمعنى أصح إحنا مش بنشوف عمل كوميدي والسلام. ده إحنا بنشوف من خلال شخصية الشيخ مرزوق (محمود البزاوي) إزاي ممكن الجهل والخرافة تتمكن من الناس، وتخليهم أسرى بتفكيرهم لشخص معتقدين أنه يقدر يعمل حاجات مايقدرش يعملها المتخصصين والأطباء، وهم بنفسهم اللي بيعطوه هالة هو لا يستحقها بالمرة.

ومش هنبقى مبالغين لو قولنا إن (بالطو) مد أيده في منطقة متوترة جدًا، هي علاقة الناس بالعلم مقابل علاقتهم بالخرافة. وأنه ناقش القضية بشكل كويس جدًا بدون ما يزعل حد، وبدون ما ينافق حد في نفس الوقت.

 

المصداقية

علشان تعمل كوميديا كويسة، أنت محتاج تبالغ في بعض الأحداث وتهول في أحداث تانية علشان تطلع من المفارقات اللي هتحصل بمواقف كوميدية تضحك الناس.

(بالطو) نجح أنه يعمل المعادلة دي بأدوات موجودة في الواقع حوالينا، زي أنه يلقي الضوء على فقر وتهميش الوحدات الطبية في المناطق الريفية في مصر، أو التعقيدات الروتينية اللي بتخلي حاجات المفروض تخلص في دقائق تستغرق وقت طويل… إلخ.

 

التجديد

مسلسل (بالطو) ما اختارش الحلول البسيطة السهلة المتعارف عليها علشان يبني علاقة كويسة مع الجمهور. يعني كان ممكن يتم تطويل المسلسل علشان يبقى 30 حلقة مثلًا. وده كان هيكون قاتل للدراما.

كان ممكن يتم اختيار نجوم صف أول علشان يعملوا البطولة. كان ممكن يتم عرض المسلسل بطريقة نمطية. لكن صناعه اختاروا العرض على منصة واتش إت. وأن عدد الحلقات يكون 10 فقط، وأن الأبطال يكونوا ممثلين مش بنفس شهرة النجوم الكبار. وكان واضح أن كل ده صب في النهاية في مصلحة المسلسل.

 

لكل الأسباب دي وأكتر، ننصحكم بركوب أول ميكروباص لطرشوخ الليف، علشان تشوفوا عمل مختلف ويستحق المشاهدة.