The Definitive Guide to Living in the Capital , Cairo , Egypt

رأيك هيكون إيه لو كنت ماشي في الشارع ولقيت بنت بتسألك إذا كان المفروض تخلي أمها تشتري لها الثلاجة اللي بتتمناها علشان الجوازة بتاعتها ما تبوظش، وفي نفس الوقت الأم بتقول لك أنها لو عملت كده هتتسجن علشان مش معاها الفلوس؟!

 

قبل ما تجاوب فكر كويس علشان ممكن تكون إجابتك متسجلة على الكاميرات في برنامج (ورطة إنسانية) واللي بيشبه برامج الكاميرا الخفية لكن علشان يوصل لنا رسالة من خلال أحداثه مش لمجرد إثارة الضحك.

بعد تتر بداية البرنامج بنبدأ نشوف الموقف اللي بتتناوله الحلقة، من خلال رسم بعض تفاصيله أمامنا على الشاشة، ثم بنبدأ نشوف الممثلين وهما بيأدوا أدوارهم بثقة والكاميرات اللي بتصور ردود أفعال الناس في الشارع.

 

 

في أحد الحلقات بنشوف شاب شايل يافطة بيطلب من الناس تتبرع لوالده بالدم علشان بيعمل عملية خطيرة. وبنشوف رد فعل الناس اللي بتهتم وبتطلب إنها تروح تتبرع، وبعض الناس التانية اللي بتساعد الولد بالفلوس.

في حلقة تانية بنشوف مجموعة شباب بيألسوا على بنت وزنها زايد، وبنشوف رد فعل الناس في المول على عملية التنمر اللي بتحصل قدام عينهم.

وفي أحد الحلقات بنشوف بنت بتضغط على والدتها علشان تشتري لها ثلاجة في جهازها رغم إن ده ممكن يتسبب في سجن الأم.

بعض الناس بترفض التعاون أو الاستماع أوالاهتمام بالأساس. والبعض التاني بيقول كلمتين يرضي بيهم ضميره ويمشي. لكن قلة من الناس بتقف وتثبت موقف وتحاول تصلح الوضع بنفسها، زي البنت الشجاعة اللي تصدت لمحاولة البنت اللي من فريق عمل البرنامج إنها تضغط على أمها وصممت تاخد الأم معاها علشان تنقذها.

 

 

 

الجميل في (ورطة إنسانية) إنه مش بيهدف للضحك، لكن بيورينا حاجات إنسانية عن شخصيات كتير من الناس ممكن تكون غايبة عننا، لكن من ناحية تانية المواقف اللي بيقدمها البرنامج بيكون واضح جدًا فيها الطرف الصح من الطرف الغلط. بالتالي الشخص اللي بيتعرض للموقف مش بيحتار كتير في انحيازه للحق، وبتبقى “الورطة” الحقيقية هي “هل هيكون لك موقف إيجابي، ولا هتختار الإنسحاب بمنطق وأنا مالي”؟

من ناحية تانية البرنامج بيعرفنا إننا غلط نكون سلبيين لما نشوف موقف واضح فيه مين غلط ومين صح.

لو كنت مكان واحد من ضيوف البرنامج هل هتكتفي بالكلام ولا هتتدخل لتصليح الغلط ولا (هتفض) لكل حاجة وتمشي في طريقك؟