The Definitive Guide to Living in the Capital , Cairo , Egypt

أعمال فنية كتيرة بتتنافس على جذب المشاهدين في رمضان 2018، لكن وسط الزحمة دي فيه مجموعة أعمال بننصحكم تتفرجوا عليها، وتحطوها في جدول الأعمال اللي هتتابعوها السنة دي، واختيارنا ده تم بناء على تجاربنا السابقة مع نفس فريق العمل، سواء ممثلين، مؤلفين، أو حتى مخرجين. كمان هنقول لكم مختصر عن الأعمال دي وكمان القنوات اللي بتعرضها.

DMC

في سنة أولى رمضان قدرت قناة DMC  تتعاقد على مسلسل النجم يحيي الفخراني، “بالحجم العائلي”، اللي رجع بعد غياب السنة اللي فاتت عن الشاشة الصغيرة، وأحداثه بتدور حول نادر، السفير السابق، اللي بيسيب شغله في الخارجية المصرية وبيفتح مطعم في قرية سياحية بسبب حبه للأكل.

القناة هتعرض كمان مسلسل “نسر الصعيد”، للفنان محمد رمضان، اللي بدأ يغير جدله مؤخرًا ويقدم أعمال حلوة، وقصته بتتكلم عن زين اللي هو ضابط شرطة، اللي بيدخل في صراع عنيف مع هتلر “سيد رجب”، رجل الأعمال الصعيدي، واللي بيشتغل في الأعمال المشبوهة.

وكمان هيتم عرض مسلسل “أمر واقع” للفنان كريم فهمي، ومن المتوقع يكون الحصان الأسود للموسم الرمضاني ده، المسلسل بيناقش قضية تنظيمات “الأولتراس”.

الحياة

من قناة الحياة بنرشح لكم تتفرجوا على محمد هنيدي، اللي هيظهر في قالب كوميدي جديد في مسلسل “أرض النفاق”، وفيه بيقدم دور “مسعود”، عامل الإنارة في الحي، اللي دخله قليل وحياته ضايعة وعنده خلافات مع مراته وحماته، اللي مش طايقينه، وهيتعرف على دكتور ماضي، اللي بيبيع له حبوب “الأخلاق”، واللي بيكتشف بعدها زيف ناس كتير في حياته.

CBC

الكبير كبير، علشان كده لازم تتفرجوا على النجم عادل إمام السنة دي، اللي غير كل فريق العمل بتاعه واستعان بشباب جداد، ولكن يفضل ابنه رامي إمام هو المخرج، لـ “عوالم خفية”، اللي هيذاع على CBC، وأحداثه بتدور حول صحفي وروائي مرتبط بعائلته وبيقضى معاهم أكبر وقت، ولما بتقع في إيده مستندات مهمة لمسئولين كبار في الدولة تدينهم في قضايا فساد بينشرها وبسببها بيدخل في دوامة وبيعرض حياته وحياة أسرته لخطر كبير.

 وبعد تغيير اسمه من “المرأة السوداء” إلى “السهام المارقة”، يظهر شريف سلامة في دور إرهابي، والمسلسل من تأليف “معز مسعود” الداعية الإسلامي، والأحداث تجرى في مدينة تحت سيطرة كيان إرهابي هو “داعش”، ومنهم اللي عاوز يهرب ومش عارف، والبعض راضي وقاعد، ولما يزيد الدم قدامهم بتتغير حاجات كتير وبتتحول الأحداث.

ON-E

وعلى قناة “أون”، هيتم عرض المسلسل التاني اللي بيتطرق لتنظيم داعش الإرهابي، “أبو عمر المصري” للفنان أحمد عز، وأحداثه بتجري عن قصة فخر الدين، وهو محامي مصري بيأسس مجموعة كتنظيم سلمي علشان يحل مشاكل وقضايا المواطنين، بعيدًا عن مافيا المحاماة وأسعارهم المبالغ فيها، ولكن فيه ناس بترفض ده، وبالتالي حاربوه وتم تصفية التنظيم، وسافر فخر الدين  فرنسا بعد ما أخد جواز سفر ابن خالته اللي اتقتل مكانه، وهناك اتجوز حبيبته القديمة وخلف “عمر”، ومراته توفت، فيهرب للسودان وينضم لجماعة مسلحة ويصبح كادر مهم ويرجع للثأر لابن خالته وزملاءه.

MBC مصر

قناة إم بي سي مصر هتعرض السنة دي حلقات جديدة من “مسرح مصر”، يوميًا في رمضان على مدار الشهر بنجومه تحت قيادة “أشرف عبد الباقي”. طبعًا تجربة مسرح مصر تستحق المتابعة.

استمتعوا برمضان ومتنسوش تخلوا بالكم من صحتكم ومتقلوش في الحلويات