دليل كايرو 360: أفضل وأسوأ مسلسلات رمضان 2017
Mohamed Hamdy
موسم درامي ثري ومميز. هو ده الوصف اللي نقدر نوصف بيه موسم رمضان 2017 الدرامي. أعمال قوية ومسلسلات مؤثرة وتنويعات هامة. لكن هل كل مسلسلات رمضان 2017 كانت قوية ومؤثرة؟ طبعًا لأ. علشان كده في الموضوع ده هنستعرض الأقوى والأضعف في دراما رمضان السنة دي.
عفاريت عدلي علام.. سقوط الزعيم في فخ التكرار
حالة من الصدمة بتواجه جمهور الزعيم عادل إمام، مع فشل مسلسله في تحقيق رد فعل إيجابي، زي ما تعودنا دائمًا من الزعيم. صاحب الأجر الأعلى والأقدر على المنافسة حتى اليوم، في سوق السينما والدراما.
عادل إمام وقع في فخ التكرار، وقدم شخصية مش جديدة وأحداث مكررة. بالإضافة لتيمة مجلس الشعب، واللي أصبحت غير كوميدية وغير مجديه بالمرة. كتير من الناس بتنصح الزعيم يغير من جلده. والأهم، يغير كاتبه المفضل يوسف معاطي.
ريح المدام.. أحمد فهمي ينجح في تقديم الكوميديا وحده
على الرغم من توقعاتنا غير المرتفعة بخصوص المسلسل، لكن الحقيقة أن النتيجة النهائية بتقول أننا أمام واحد من أفضل المسلسلات الكوميدية في رمضان 2017. أحمد فهمي بالتعاون مع أكرم حسني ومي عمر، قدروا يقدموا توليفة كوميدية جيدة ومميزة، وتستحق المشاهدة.
طاقة نور.. أكشن ضعيف من هاني سلامة
على الرغم من نجاح مسلسلات الحركة في رمضان 2017، لكن مسلسل طاقة نور كان محتاج يكون أقوى من النتيجة النهائية اللي شوفناها على الشاشة. الأكشن في الفيلم كان ضعيف، والمستوى الإخراجي كان محتاج يكون أفضل بكتير من النتيجة النهائية اللي شوفناها أمامنا على الشاشة. هارد لك هاني سلامة.
واحة الغروب.. أداء مميز من خالد النبوي
أما مسلسل واحة الغروب، فقدر خالد النبوي يقدم فيه أداء مميز. خاصة أن المسلسل نفسه مكتوب كويس جدًا، ومقتبس عن رواية بتحمل نفس الاسم، للكاتب المميز بهاء طاهر. كمان منة شلبي قدمت أداء مميز ومختلف، وتستحق عليه التحية.
خلصانه بشياكه.. خلصانه بزعل محبي مكي
محبي أحمد مكي، رغم فرحتهم بقرار انضمامه لشيكو وهشام ماجد في أحدث أعمالهم الدرامية، إلا إن ضعف المسلسل وعدم قدرته على تحقيق نسبة مشاهدات قوية، أكد على أن الفريق الجديد محتاج يشتغل أكتر على نفسه. خصوصًا فيما يتعلق بالكتابة والإخراج. علشان مستوى مسلسل خلصانه بشياكه رغم إنه جيد، لكنه لا يرقى لمستوى أحمد مكي اللي عودنا عليه.
ظل الرئيس.. ميلاد نجم جديد
على الرغم من تخوفنا من قدرة ياسر جلال على تحمل بطولة عمل كامل لوحده، لكن ياسر قدر يعمل المستحيل ويقدم مسلسل مميز، وقادر على المنافسة في السباق الرمضاني. لازم نرفع له القبعة.
هربانه منها.. النجاح هرب من ياسمين عبد العزيز
واحد من أسوأ المسلسلات الكوميدية في رمضان2017. ياسمين عبد العزيز للأسف هرب منها النجاح، مع تقديمها لنفس الأداء اللي بتقدمه في كل مسلسلاتها وأعمالها السينمائية، من يوم ما بدأت تمثيل ولحد النهارده.
لا تطفىء الشمس.. تأرجح بين النجاح والفشل
من أكتر المسلسلات اللي أثارت الجدل في رمضان 2017. الغريب في لا تطفىء الشمس إن مالوش حلول وسط. إما تعشقه حتى النخاع، أو تكرهه لأخر يوم في عمرك. إحنا عن نفسنا حبيناه.. انتو أيه رأيكم؟
30 يوم.. هذا النجاح الرائع
واحد من أنجح المسلسلات في رمضان 2017 في رأينا. وقدرة غير عادية من باسل خياط وآسر ياسين، على تقمص شخصياتهم للحد الأقصى. بجد لازم نرفع القبعة احترامًا للمواهب دي.
الزيبق.. اللعب في المضمون
أما مسلسل الزيبق فقدر يحقق نجاح جيد متناسب مع ميزانيته، اللي ممكن تكون مش أعلى ميزانية في رمضان2017. ولولا بعض الأخطاء – فيما يتعلق بأن أحداث المسلسل بتدور في 1998، بينما بتظهر طوال الوقت أجهزة كمبيوتر وسيارات حديثة جدًا ضمن الأحداث – كان ممكن نعتبر المسلسل متميز فعلًا. عمومًا الزيبق بيلعب في المساحة المضمونة من الدراما في مصر. وهى أعمال المخابرات.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
