The Definitive Guide to Living in the Capital , Cairo , Egypt

شهر رمضان معروف أنه موسم للدراما التليفزيونية، والسنة دي فيه أكتر من 25 مسلسل رغم ظروف “كورونا” اللي بيمر بيها العالم، وتنوعت المسلسلات دي ما بين كوميدي وتراجيدي وأكشن وكمان خيال علمي، علشان كده سألنا بعض المصريين، إيه أكتر مسلسل شدكم من الحلقة الأولى؟ وفي السطور الجاية هنقولكم على الإجابات.

أحمد حقي اختار مسلسل “100 وش”، وقال لنا إنه بيعتبره أكتر مسلسل رمضاني متماسك، وأحداثه مترابطة وبتتقدم بشكل سلس وحلو، وفيه كوميديا لايت، أما هشام فؤاد فقال لنا إن مسلسل “الاختيار” هو أكتر عمل عجبه، وأضاف إن كل مصري بيحب بلده لازم يشوفه، وهشام اختار كمان مسلسل “ليالينا 80″، وقال إنه بيقكره بنفسه وهو صغير.

حسين شكري، قال لنا إن أكتر مسلسل شد انتباهه هو في موسم رمضان 2020 هو مسلسل “النهاية” وده لأنه فكرة جديدة في الدراما المصرية ماتنفذتش قبل كده وحابب يشوف آخرها إيه، أما حنان نوح فاختارت مسلسل “فلانتينو” واعتبرته عمل كوميدي مميز وبيخرجها من الاكتئاب اللي عايشة فيه بسبب أحداث انتشار فيروس “كورونا” المستجد.

على عكس الآراء اللي فاتت، قال لنا أحمد أبو خليل إنه رافض تمامًا الفرجة على مسلسلات رمضان الجديدة، وقال إنه في المقابل بيتجه لمشاهدة قناة ماسبيرو زمان علشان يتفرج على بوجي وطمطم، وعمو فؤاد، وقال إنه بيتمنى أولاده يطلعوا متربيين عليهم زي ما هو اتربى عليهم زمان.

أما خالد الأمير فقال إنه مافيش أي حاجة شدته في كل المسلسلات، واختار يتفرج على مسلسل الأطفال “بكار” على يوتيوب.

واختار علي الخولي مسلسل “ليالينا 80″، بسبب إنه في أول 3 حلقات حس برسم كويس للشخصيات، واعتبر أن لحظة اغتيال السادات هي بداية تشريح للمجتمع وإن المسلسل وصفها صح، وأضاف إن خالد الصاوي عامل دور هايل، وإياد نصار جيد جدًا، ووكمان شده مسلسل “لما كنا صغيرين” لأنه عنده شغف أنه يشوف محمود حميدة علي الشاشة الصغيرة، وخصوصًا مع خالد الصاوي، وأحداث الـ3 حلقات الأولى بتوحي أنه فيه مفاجآت درامية.

واختارت عفاف حمدي، مسلسل “بـ100 وش” باعتباره كوميدي ولايت، ومسلسل “نحب تاني ليه؟” لأنه درامي كوميدي ، وكمان بتتابع مسلسل “لما كنا صغيرين”، علشان خاطر خالد النبوي ومحمود حميدة.

أما محمد الشعار فقال لنا إن اللي شده من أول حلقة هو مسلسل “الاختيار”، واعتبر إن التاريخ مدروس فيه كويس، والمعارك والتصوير معمولين فيه صح، وكمان التمثيل قوي.

وهبه شعيب وقع اختيارها على مسلسلي “فرصة ثانية”، و”لعبة النسيان”، واللي شايفة إن فيهم قصة وتشويق من أول حلقة، وكمان غموض، ومنال سيد قالت لنا إن اللي شدها في أولى أيام رمضان هو مسلسل “بـ 100 وش” وقالت إنه خفيف وإيقاعه شيق، وأضافت إنها بتحب الأبطال والمخرجة.

أما شروق إسماعيل فقالت لنا إن المسلسل اللي شدها هو “الاختيار”، لأنه بيتكلم عن فترة صعبة في تاريخ مصر، وبيقدم نموذج بطولي مهم، وأضافت إنها كمان بتتفرج على مسلسل “لعبة النسيان” لأنها متوقعة أنه هيكون قصة حلوة.

وقالت أسماء عصام إنها معجبة بمسلسل “لعبة النسيان” وقالت إن الأحداث دايمًا بتشدها علشان تشوف الحلقة اللي بعدها وتعرف هيحصل إيه.

هبه عامر شدها 3 مسلسلات وهم، “النهاية”، لأنها واثقة في يوسف الشريف ومتبعاه من زمان، و”الاختيار” علشان عايزة تعرف أكتر عن الشهيد أحمد منسى، و”لعبة النسيان” علشان فيه جريمة ولغز.

واختارت زينب غرياني مسلسل “الاختيار” باعتباره المسلسل الوحيد اللي شدها في رمضان، وده لأن دخلة الحلقة الأولى شدتها تعرف باقي القصة، وكمان عجبها الدور اللي قام بيه أمير كرارة.

وأنتم إيه أكتر مسلسل متابعينه من مسلسلات رمضان 2020؟