The Definitive Guide to Living in the Capital , Cairo , Egypt

رمضان بيعتبر أفضل موسم بتستغله الشركات لتسويق منتجاتها في مصر، والإعلانات فيه مابتخلصش، وسواء كنت بتتفرج على برنامج أو مسلسل أو حتى فيلم، لازم هتلاقي فواصل إعلانية متكررة، وعلشان كده قررنا نسأل بعض المشاهدين عن أكتر الإعلانات التجارية اللي عجبتهم في موسم رمضان 2020، وفي السطور الجاية هنقول لكم على الإجابات.

محمود رمضان، قال لنا إن أكتر إعلان عجبه هو إعلان شبكة فودافون اللي ظهر فيه محمد صلاح ومنى زكي ونجوم أكتر، بسبب إنهم احترموا عقول الناس والواقع اللي عايشينه وجائحة فيروس “كورونا” وتم تصويره عن بعد، بحسب رأيه.. ووافقه في الرأي كريم الكناني، اللي اعتبر إن صناع الإعلان راعوا التباعد الاجتماعي ووصلوا رسالة أنه رغم البعد التكنولوجيا بتقربنا لبعض.

أما رضوى شلش فقالت إن إعلان اتصالات اللي ظهر فيه أحمد حلمى عجبها جدًا لأنه أظهر حالة الزهق اللي كتير من الناس بتمر بيها الفترة دي بسبب القعدة في البيت، وأنهم مش عارفين يعملوا حاجة وبيحاولوا يتأقلموا، كمان عبرت رضوى عن إعجابها باعلان اتصالات اللي ظهر فيه أحمد أمين، لأن صناع ركزوا على إننا نقدر نعمل كل حاجة من البيت عادي باستخدام التكنولوجيا، واضافت رضوى إنها معجبة كمان بإعلان شركة We وقالت إن الفنان مصطفى خاطر كان كوميدي جدًا فيه، خصوصًا لما طلع يغني في البلكونة وماحدش رد عليه.

واتفق مع رضوى عمرو جمال، اللي اعتبر إن إعلان أحمد حلمي كان هو الأفضل، على الرغم من إن الفكرة مش كرييتيف بحسب تعبيره، لكنه أكد إن أداء أحمد حلمي كان مميز.

أما آيه موسى، فعجبها إعلان أورانج مصر، اللي بيتكلم عن المغتربين، وإنه مهما طالت المسافات والدنيا فرقتهم موجودين في القلب، واتفقت معاها في الرأي ده هاجر الحكيم، وقالت إن إعلان أورانج أغنيته حلوة ومعبرة عن الشعب المصري. واتفقت معاهم بسمة ناصف واللي قالت إن الإعلان عجبها لأنها في الغربة ونفسها ترجع مصر من تاني.

أما أحمد محمد صبري فعجبه إعلان شركة موبيل وان، وقال لنا إنه رغم إن محمد صلاح المفروض نجم كبير، لكن الإعلان اختار يحكي عن بطولة ناس تانية بسيطة، زي سواق مقطورة بيقضي يومه وأكله وشربه في الكابينة، وشاب بيجيب عربية قسط ويشتغل أوبر مثلًا، وأن صلاح موجود في الإعلان بس مش أهم واحد فيه، وأضاف أن المُنتَج واضح وليه علاقه بالأغنية وفكرته كويسة، واعتبرت آلاء موسى إن إعلان بنك مصر مميز ومختلف لأنه على حسب وصفها فيه طاقة إيجابية كبيرة، وإن كل صورة اتعرضت في الإعلان كان ليها معنى.

يسرا بيتر قالت لنا إن أكتر إعلان عجبها هو إعلان صيدليات 19011، واللي رجعها لفترة التسعينيات اللي بتحبها، وكمان هي عجبتها أغنية الإعلان.