كايرو 360 ترشح لكم.. 5 مسلسلات ماتفوتكش على منصة شاهد
أعمال تستحق المشاهدة أعمال شاهد مسلسلات على شاهد مسلسلات مصرية
Cairo 360
من بداية تأسيسها وإحنا عندنا كل المشاعر الإيجابية ناحية منصة شاهد، كمنصة عربية خالصة مدعومة برأس مال كبير علشان تقدم للمشاهد العربي محتوى محترم يليق به، وتنافس تطبيقات مشاهدة ضخمة بحجم آبل تي في+ أو حتى نتفليكس. ودي إضافة المشاهد العربي كان عاوزها ويستحقها.
ومع الوقت أصبح المحتوى على شاهد ضخم جدًا، علشان كده حبينا نرشح لكم 5 مسلسلات تستحق المشاهدة على المنصة. تعالوا نتعرف عليها أكتر.
سيب وأنا أسيب
مسلسل كوميدي من 10 حلقات متوفر بكل حلقاته على شاهد، عن الصراع بين الأنفلونسر بيلا الجندي (هنا الزاهد) وجوزها (أحمد صلاح السعدني) واللي بينتج عنه سلسلة لا تنتهي من المواقف الكوميدية.
المسلسل من تأليف رنا أبو الريش وإخراج وائل إحسان وبيشارك في البطولة آيه سماحة ومحمد جمعة وعارفة عبد الرسول وغيرهم.
موضوع عائلي
موضوع عائلي هو مسلسل مصري اجتماعي كوميدي، مكون من موسمين، بإجمالي 22 حلقة. عن قصة الشيف إبراهيم (ماجد الكدواني) اللي بيعرف أن بنته اللي اتحرم من أنه يشوفها سنين طويلة (رنا رئيس) بتتعرض لمشاكل كتير ومحتاجاه يكون جنبها.
إبراهيم بيقرر يقف جنب بنته بس بدون ما يعرفها العلاقة بينهم علشان ما يعملهاش صدمة. ومن هنا بتبدأ سلسلة من المواقف الكوميدية اللي بتمتد على الموسمين الخاصين بالمسلسل وبتعيشنا معاهم جو كوميدي مختلف.
موضوع عائلي من تأليف وإخراج أحمد الجندي وبيشارك في بطولته سما إبراهيم ومحمد شاهين ومحمد رضوان.
ليه لأ؟! الجزء الثالث
ناخدكم من الكوميديا شوية للمسلسلات اللي بتناقش قضايا اجتماعية. ليه لأ في موسمه الثالث، بيحكي عن شيري (نيللي كريم) اللي بتعيش بعد انفصالها عن جوزها علشان تربي أولادها، ياسمين وياسين (فريدة رجب ومعتز هشام)، ثم بتتعرف على طبيب بيطري (أحمد طارق)، وبيقرروا يتجوزوا.
لكن معارضة الابن المراهق بتحول حياة الأسرة كلها لجحيم، وبتعمل سلسلة من المواجهات نقدر نعتبرها العامود الفقري لـ15 حلقة هتلاقي نفسك بتتفرج عليهم ورا بعض علشان تعرف أيه اللي هيحصل.
ليه لأ من تأليف مريم نعوم وإخراج نادين خان وبيشارك البطولة صلاح عبد الله وأمير صلاح ونادين وحنين سعيد.
الغرفة 207
ولو فاكرين أن كل اللي معانا كوميدي واجتماعي بس تبقوا غلطانين..
مسلسل الغرفة 207 هو واحد من أقوى مسلسلات الرعب المصرية، مقتبس عن قصة للدكتور أحمد خالد توفيق، ومن إخراج محمد بكير.
المسلسل بيحكي عن جمال الصواف (محمد فراج)، اللي بيشتغل في فندق منعزل فيه غرفة مسحورة، اللي بيحصل فيها بجد كفيل أنه يخلي أي حد شعره يشيب.
مع الوقت جمال بيكتشف أن عمله في الفندق مش مصادفة، وأن وجوده له علاقة بأحداث ما ورائية غريبة تم تجسيدها على الشاشة ببراعة.
بيشارك في بطولة الغرفة 207 ريهام عبد الغفور وناردين فرج ومراد مكرم ويوسف عثمان وغيرهم كتير.
النزوة
وأخيرًا، مسلسل النزوة، اللي ممكن نعتبره مسلسل بيجمع بين الرومانسية والغموض مع شوية أكشن، عن عمر شاهين (خالد النبوي) اللي بيتورط في علاقة مع واحده بتشتغل في مطعم (عائشة بن أحمد) مع عدم علم زوجته (سالي شاهين)، وسلسلة من المواقف المعقدة والمركبة اللي بتحصل نتيجة العلاقة دي، وإزاي تطورات الأحداث ممكن تؤدي لجريمة، تخلي الشرطة -وإحنا معاها- متورطين في 15 حلقة من محاولة فك لغز الجريمة، ولغز قصة الحب الأغرب.
بيشارك في بطولة (النزوة) عمر الشناوي ومراد مكرم وغيرهم من الأبطال.
مقترح
معالم وسياحة
المتحف القبطي بالقاهرة.. هنا أكبر مجموعة آثار قبطية في العالم
المتحف القبطي المتحف القبطي المصري +3
الحياة في كايرو
