كل اللي محتاج تعرفه عن برنامج رامز جلال في رمضان 2017
Cairo 360
سواء اتفقنا أو اختلفنا معاه، رامز جلال أصبح علامة من علامات شهر رمضان، وبرنامجه بيحقق نسبة مشاهدة عالية جدًا، وبيسبب حالة جدل ماحدش يقدر ينكرها، كايرو 360 جابت لكم تفاصيل برنامجه الجديد “رامز تحت الأرض” واللي هتعرضه قناة mbc مصر يوميًا طوال شهر رمضان بعد الفطار مباشرة.
من أيام قليلة انتهى رامز جلال من تصوير آخر حلقة من حلقات “رامز تحت الأرض”، وكانت بطلة الحلقة دي الممثلة منة جلال.
(الممثلة منة جلال)
فكرة البرنامج السنة دي مختلفة شوية عن كل سنة، سبب الاختلاف إن اللي بيقنع النجوم بالحضور اسم مهم في عالم التقديم وهو المذيع “نيشان” اللي بيتصل بالنجوم وبيقنعهم أنه بيقدم برنامج على إحدى القنوات الفضائية، وبمجرد ما النجم يقتنع ويوافق بيبدأ المقلب.
حالة رعب
فكرة مقلب السنة دي عبارة عن دعوة الضيف للتصوير في برنامج من تقديم نيشان، بيروح وهو مصدق، لكن بعد ما بيتم توصيله لمكان فى الصحراء بيلاقي مصيبة حقيقية في انتظاره، فريق البرنامج بيقنعوه أنهم وقعوا في منطقة رمال متحركة، وبتبدأ العربية اللي هو فيها بالفعل تنزل تحت الرملة.. وفجأة!
وفجأة بيظهر كائن غريب أشبه [سحلية ضخمة، بيبدأ يطلع من تحت الرملة واحدة واحدة، وبيبدأ الضيف يصرخ ويطلب من أي حد ينقذه.
وبعد ما الضيف يشرب المقلب ويصدق أن فيه كائن غريب خرج له من تحت الرملة علشان ياكله، بيخرج له من جوه الكائن ده رامز جلال بنفسه وهو بيضحك، وبينتهي المقلب وسط صدمة الفنان أو الرياضي اللي اتعرض للملقب.
(الفنان رامز جلال)
حقيقة الكائن الغريب
الكائن الغريب اللي بيظهر للضيف هو مجسم مصنوع من مواد خاصة ونفذه مجموعة من مصممي الخدع في الأفلام العالمية.
وبحسب مصدر مهم من فريق البرنامج لكايرو 360 تم الاستعانة بأطباء علشان ينقذوا أي ضيف ممكن يتعرض لصدمة بسبب خوفه من المقلب.
أغنية البرنامج
أغنية تيتر البرنامج اسمها “رامز تحت الأرض” وتم تسجيلها بالفعل، وهي من تلحين محمد عبد المنعم وكتب كلماتها الشاعر محمد البوغة.
نجوم رامز تحت الأرض
المذيع طوني خليفة والمطربة لطيفة مش هيظهروا في البرنامج السنة دي لأنهم اكتشفوا المقلب قبل التصوير، ورفضوا يشاركوا في البرنامج، لكن فيه نجوم تانيين شربوا المقلب للنهاية ومنهم روجينا، واللاعب رمضان صبحي، وسارة سلامة، وسما المصري، ومايا دياب، ومها أحمد، وسعد الصغير، ودينا، ونجوم غيرهم.
البرنامج هيعرض على: mbc مصر
رئيس التحرير: عبد الحميد العش
تقديم: رامز جلال
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
