The Definitive Guide to Living in the Capital , Cairo , Egypt

قد إيه كلنا بنشتاق لزمان وأغاني وبرامج زمان، النهارده هنقدم لكم كنز بكل ما تحمله الكلمة من معني.

إحنا شايفين إن التلفزيون بأغلب قنواته الفضائية بقي بيفتقد لعنصر مهم جدًا وهو تقديم محتوي يثقف وينمي فكر كل المشاهدين، وتحولت معظم البرامج لبرامج إخبارية أو توك شو بينقل فكر يا مع يا ضد، وقليل جدًا لما بنشوف حد من المذيعين بيلتزم بالحيادية.

كنز مخفي في كل بيت

الكنز اللي هنتكلم عليه النهارده هو قناة  “ماسبيرو زمان” واللي أطلقتها مجموعة قنوات النيل لاتحاد الإذاعة والتلفزيون، القناة دي للأسف مش كل الناس تعرفها مع أنها موجودة في كل قوائم التلفزيونات. في المقال ده كايرو 360 هتعرفكم فايتكم إيه.

العقاد و نجيب محفوظ علي التلفزيون

من أجمل اللحظات أنك تكون بتقلب في التلفزيون وتتفاجئ بحوار تلفزيوني نادر لنجيب محفوظ أو د/ مصطفي محمود أو الأديب الكبير عباس العقاد وهما بتكلموا عن كتاباتهم وحياتهم الشخصية والاجتماعية، والظروف اللي خليتهم يبدعوا ويقدموا لنا حاجات غيرت في تفكير أجيال كاملة.

 

 

سهرات فنية نادرة

أو أنك تسهر سهرة فنية نادرة للفنان عبد الحليم حافظ أو أم كلثوم أو حتي تتفرج علي لقاء تلفزيوني للفنان رشدي أباظة وزوجته سامية جمال وتتفرج علي بيتهم وحياتهم ومش هتتخيل أن المذيعة اللي بتقدم لك البرنامج هي الفنانة الجميلة ميرفت أمين.

 

 

تغطية خاصة لمهرجان القاهرة السينمائي لعام 1989

أو أنك تشوف الإعلامية سلمى الشماع في تغطية خاصة لفعاليات مهرجان القاهرة السينمائي الدولي لعام 1989 و تتفرج علي  اللقاءات اللي عملتها مع كوكبة من الفنانين والنقاد.

 

 

وكل ده طبعًا غير مباريات كرة القدم اللي هتتفرج فيها علي لعب الكرة اللي بجد والمشجعين اللي بيشجعوا اللعبه الحلوة والفرحة اللي بتطلع من القلب.

يعني القناة متنوعة من بين دراما ورياضة وبرامج وأغاني أهم حاجة في القناة دي أن مع كل برنامج هتتفرج عليه هتحس أن عقلك هيتنور وروحك فعلًا هتفرح وتطير بكل حاجه أنت بتتفرج عليها.

 

 

لأول مرة علي “ماسبيرو زمان”

من أحسن الحاجات في القناة أنهم واعدين مشاهديهم أنهم هيعرضوا حاجات أول مرة تتذاع في العصر الحديث من كنور ماسبيرو، علشان كده بيحرصوا أنهم يحطوا العلامة المائية الخاصة بالقناة علي كل حاجه بتتعرض عليها.

بننصحكم بمتابعة القناة الممتعة دي وبنتمني أن باقي القنوات تحاول تعرض حاجات تثقف بيها عقلنا وتغذي أروحنا.

بنعيب عليهم أنهم مش عاملين دعاية كبيرة تخلي كل الناس تعرفهم وتتفرج عليهم وتابعهم.

 

 

تردد القناة: 11842 أفقي

بروموا القناة هنا

صفحتهم علي الفيسبوك هنا