The Definitive Guide to Living in the Capital , Cairo , Egypt

كل اللي بيحبوا المسلسلات الأجنبية، اتعودوا على جرعات الإبداع المتواصلة من الدراما الأمريكية. اللي دايمًا بتتميز بإمكانيات عالية جدًا. سواء في الجودة أو المضمون. من مسلسلات تاريخية أو أكشن أو رعب. لكن فجأة وبدون مقدمات، دخلت علينا شبكة Netflix بمسلسل La Casa De Papel الإسباني. العمل اللي غير رأي كتير في الدراما الإسبانية، وخلاهم يعيدوا التفكير فيها بشكل مختلف تمامًا.

الاسم معناه The House of Paper (بيت الورق). موجود على IMDB باسم “Money Heist”. وبيدور المسلسل عن فريق مكون من 8 من أمهر اللصوص في إسبانيا، بيجمعهم ويقودهم شخص اسمه “البروفيسور”. علشان ينفذوا أكبر عملية سرقة في تاريخ إسبانيا، سرقة دار صك العملة. من خلال طبع 2400 مليون يورو، والهروب بهم. وكل ده خلال أيام معدودة. وبدون ما يقتلوا رهينة واحدة.

بتبدأ الأحداث من خلال رواية واحدة من اللصوص، “طوكيو”، وبنتعرف بعدها على باقي أفراد الفريق. اللي سموا نفسهم بأسامي المدن: برلين – نيروبي – دينفر – موسكو – ريو – هيلسنكي – أوسلو، وأخيرًا البروفيسور.

المسلسل بياخدك على طول ليوم السرقة، وبيحطك في الأحداث فورًا. ودي كانت بداية قوية جدًا شدتنا للأحداث، وزودت عنصر التشويق في المسلسل. وبعد كده بيوضح كل مرحلة خطوة خطوة بالفلاش باك.

كل واحد في الأبطال عمل دوره على أكمل وجه. فهنلاقي مثلا “برلين” الشخص الغامض، اللي لحد ما مكروه من الباقي بسبب طباعه الغريبة. أو “طوكيو” البنت المتهورة، اللي ممكن تعرض نفسها واللي حواليها للخطر في لحظة وبدون تفكير. ومع تتابع الحلقات، المسلسل بيعرض الـ back story لكل شخصية قبل عملية السرقة.

حالة غريبة من الإثارة والتشويق بيخلقها المسلسل، بتخليك طول الحلقات مشدود ما بين عملية السرقة اللي بتتنفذ، وتحقيقات البوليس اللي بتتم، وتعامل اللصوص مع الرهائن جوة المكان. أجواء مثيرة ومختلفة بتتحط فيها، وتفضل مركز ومنتبه لحد آخر لحظة. ودي حاجة تُحسب للمسلسل.

كمشاهد مش هتحس بزهق إطلاقًا وانت بتتفرج، خاصة في تحركات “البروفيسور” من ناحية، وتحركات المحققة “راكيل” من ناحية تانية. هنا بتلاقي نفسك وسط لعبة القط والفار. وتتحمس تعرف مين اللي هيكسب في كل جولة. واللي دايمًا بتنتهي بفوز ساحق أو نهاية مدمرة، لكل طرف.

لحد نهاية المسلسل انت مش عارف يا ترى هينجحوا ولا هيفشلوا؟ طب مين هيعيش ومين هيموت؟ أسئلة كتيرة وتويستات بتحصل في النهاية. هتخليك تحب المسلسل أكتر وأكتر.

مسلسل La Casa De Papel اتعرض على قناة Antena 3 الإسبانية في 2 مايو 2017، وبعدها اتعرض على نتفليكس في 25 ديسمبر 2017.

تقييم المسلسل 8.8 على IMdb. لو بتحب المسلسلات اللي فكرتها قائمة على السرقة والخطط الذكية والتشويق.. لازم تشوفه.