The Definitive Guide to Living in the Capital , Cairo , Egypt

برامج المقالب أصبح سوقها الحقيقي هو شهر رمضان، السنة دي اتفرجنا على نجوم كتير وهم بيتعرضوا لمقالب، بعضهم بيواجه نار من كل الإتجاهات في برنامج رامز بيلعب بالنار، وبعضهم في غابة مع أسود وثعابين مع هاني في الأدغال، لكن يا ترى النجم بيقبض كام علشان يظهر في البرنامج؟ كايرو 360 اطقست وجابت لكم الأرقام الأكيدة.

 

رامز بيلعب بالنار

رامز بيلعب بالنار برنامج مقالب بتعرضه قناة إم بي سي مصر، البرنامج اللي بيقدمه الممثل رامز جلال تم تصويره في المغرب، والنجوم فيه بيلاقوا نفسهم في فندق بيوله والمطلوب يهربوا من النار ويطلعوا لسطح البرج، أجور النجوم في برنامج رامز بيلعب بالنار أنقسمت لثلاث أقسام، أجور كبيرة ودي حصل عليها النجوم العالميين زي ستيفن سيجال وأنطونيو بانديراس اللي قبضوا 100 ألف دولار (احسبوها بالمصري كده)، وأجور حصل عليها نجوم الصف الأول زي مثلًا راغب علامة اللي خد شيك بـ 25 ألف دولار، وصابر الرباعي قبض 20 ألف دولار، وآخر قسم هو النجوم المصريين اللي تم حسابهم بالجنيه المصري، وأجورهم كانت أقل بكتير من النجوم العالميين والعرب مش عارفين ليه الحقيقة) وأجورهم تراوحت من 150 ألف جنيه لنجوم الصف الأول من أمثال غادة عادل، ووصلت الأجور لمبلغ 50 ألف جنيه حصل عليها أسماء زي المطربة بوسي والممثلة انتصار وعلا غانم ودينا الشربيني وغيرهم.

 

 

هاني في الأدغال

هاني في الأدغال برنامج مقالب بتعرضه قناة الحياة يوميًا في رمضان وبيقدمه الممثل هاني رمزي، وفكرته بتدور حوالين نجم بيسافر جنوب إفريقيا بحجة الترويج للسياحة، وهناك بيلاقي نفسه في مواجهة كام أسد على تعبان في غابة كبيرة وهو محبوس جوه عربية، أجور النجوم في البرنامج انقسمت لقمسين نجوم حصلوا على 20 ألف دولار زي إلهام شاهين، فيفي عبده، وغيرهم ونجوم حصلوا على 10 آلاف دورلار زي كريم فهمي ودينا الشربيني وغيرهم.

 

 

بغض النظر عن المبلغ اللي بيحصل عليه النجم مقابل الظهور في برامج المقالب، فيه سؤال بيطرح نفسه، النجوم بيحسبوها إزاي؟ بعض النجوم بيكون عارف فعلًا أنه هيظهر في برنامج مقالب، وبعضهم أصلًا مابيظهرش غير في برامج مقالب زي الممثلة مها أحمد ونشوى مصطفى، ليه بيوافقوا؟ بحسب معدين برامج مقالب اتكلمنا معاهم قالوا لنا أن النجم بيحسبها بأنه مشهد تمثيلي زي أي مشهد بيقوم بيه في مسلسل أو فيلم يعني بيزنس مش أكتر.

 

السؤال ليكم أنتم: توافقوا تتعرضوا لمقلب مقابل مبلغ مالي كبير؟