The Definitive Guide to Living in the Capital , Cairo , Egypt

رنا شرف

الصورة: Liv Bruce

مع قرب احتفالنا بمناسبة عيد الأم، لازم نفتكر ست الحبايب بكل الخير والحب، والدراما المصرية على مر السنين افتكرت الأم وقدمت عنها مئات الأعمال المميزة والخالدة، والنهارده هنكلمكم عن 5 أعمال تليفزيونية قدمت الأم بصورة عظيمة ومميزة.

 

الوتد

رغم إنه إنتاج عام 1996، إلا أنه واحد من أكثر المسلسلات اللي ما مبنزهقش من مشاهدتها. مين ماحبش الحاجة فاطمة تعلبة، الشخصية القوية للأم اللى لعبتها الفنانة الكبيرة هدي سلطان، السيدة الريفية البسيطة اللي بتتمتع بحكمة وعقل يوزن بلد.

 

سابع جار

من المسلسلات الحديثة اللى اتكلمت عن دور الأم بشكل عصري، من خلال شخصية الأم المصرية البسيطة اللي قدمتها الفنانة الكبيرة الراحلة دلال عبد العزيز، واللي عبرت عن قوة الأم في تربية الأبناء وفي نفس الوقت خوفها الدائم عليهم.

 

خيانة عهد

مسلسل مميز بفكرة غير تقليدية، بيحكي عن أم فقدت إبنها وإزاى بتنتقم من اللى حرموها منه بشكل درامي يمكن يكون بعيد عن الواقع شوية، لكن الفنانة الكبيرة يسرا جسدت الشخصية بشكل مميز وقدرت تدينا بصدق إحساس الأم اللي فقدت ابنها.

 

أبو العروسة

رغم إن المسلسل اسمه أبو العروسة، لكن دور الأم فيه كان طاغي، واحد من أجمل الأعمال اللي جسدت الأسرة المصرية بشكل جميل وبسيط وواقعي جدًا، وأداء الفنانة الكبيرة سوسن بدر لدور الأم في المسلسل حقيقي يستحق الإشادة.

 

الست أصيلة

يمكن البعض يستغرب من وجود عمل للفنانة فيفي عبده في القائمة دي! لكن الحقيقة مسلسل الست أصيلة يعتبر عمل مميز، قدم صورة يمكن تكون تقليدية للأم، لكن الأحداث كانت مصرية جدًا، وعبر عن الأم الأرملة، البسيطة في كل شيء، واللى بتقرر تكون أب وأم لأولادها وتعيش لهم وتكافح علشان تربيهم.

 

كل سنة وكل أم بخير، وربنا يرحم كل أم رحلت عن عالمنا.