5 مصري.. أعمال تستحق المشاهدة على منصة Watchit
أعمال watchit أفضل أعمال وتش إت مسلسلات واتس إت
Cairo 360
كل منصة مشاهدة بيتم الإعلان عنها، لازم يكون لها هويتها الخاصة، يعني مثلًا Netflix بتلعب على مبدأ توافر عدد ضخم من الأعمال تقدر تشوفها بسعر مناسب شهريًا، بينما Apple TV+ بتلعب على فكرة التميز الكيفي مش الكمي، بينما (شاهد) لها هوية عربية أكثر. أما منصة Watchit فواخدة اتجاه مصري صِرف، من خلال تركيزها على الدراما والأفلام المصرية.
تعالوا نشوف ترشيحات كايرو 360 لـ5 أعمال ماننصحكش تفوتهم على (ووتش إت).
بالطو
بالطو هو مسلسل كوميدي، بيحكي عن عاطف (عصام عمر) الطبيب الشاب اللي بيستلم تكليفه للعمل كطبيب امتياز في وحدة صحية في أحد القرى، ومن هنا بتبدأ مجموعة من المواقف الكوميدية على مدار عشر حلقات.
المميز في المسلسل أن كل صناعه والمشاركين فيه تقريبًا من الشباب، وقدم لنا مواهب كتير شابة هنعتمد عليها مستقبلاً في أنهم يكونوا أبطال اعمال منفردة.
بيشترك في بطولة بالطو محمود البزاوي وسلافة غانم ومحمد رضوان وميرنا زكري. والمسلسل من تأليف أحمد عاطف وإخراج عمر المهندس.
ريفو
ريفو هو اسم باند مُتخيل، كان بيلعب وحقق شهرة ضخمة في التسعينيات، قبل ما تنتهي قصة الفريق بمشكلة كبيرة. كواليس الباند ده بتدور وراها مريم فخر الدين (ركين سعيد) علشان تكمل كتابة الفيلم اللي بدأه أبوها، وفي طريقها لمعرفة قصة الباند بتكتشف حقائق كتير مكانتش تعرفها عن أبوها أو عيلتها أو عن نفسها هي كمان.
ريفو حقق نجاح كبير ومكون من موسمين كل موسم عشر حلقات، بيشارك في بطولته أمير عيد وملك الحسيني وتامر هاشم ومحمد المولى. تأليف محمد ناير وإخراج يحيي إسماعيل.
تحت الوصاية
تحت الوصاية هو واحد من أنجح المسلسلات اللي اتعرضت في رمضان الماضي، منى زكي بتلعب دور سيدة بتضطر تشتغل في الصيد مع البحارة على مركب في عرض المياه، علشان تقدر تصرف على أولادها بعد وفاة زوجها، ومع تعقيد الأحداث ومحاولة شقيق الزوج (دياب) السيطرة عليها وإفشال جهودها، بنشوف تقلبات الزمن والأحداث وتأثيرها على الأم والأطفال مع بعض.
تحت الوصاية من تأليف خالد دياب وإخراج محمد شاكر خضير، بيشارك في بطولته رشدي الشامي ومها نصار وخالد كمال.
جعفر العمدة
ماحدش يقدر ينكر النجاح الضخم لمسلسل جعفر العمدة، اللي بيلعب فيه محمد رمضان دور كبير منطقة السيدة زينب، وزوجاته الأربعة ومحاولته البحث عن أبنه الضائع (أحمد داش)، كل ده في وسط تحالف أعداء جعفر ضده، ومحاولتهم الوقيعة بينه وبين زوجاته، ومحاولة القضاء عليه بأكتر من طريقة.
جعفر العمدة من تأليف وإخراج محمد سامي، وبيشارك في بطولته زينة وهالة صدقي وإيمان العاصي ومنة فضالي وغيرهم كتير.
الأصلي
وأخيرًا مع مسلسل الأصلي، عن قصة أمين جمال وإخراج أحمد حسن، واللي بنشوف فيه قصة فاطمة الأصلي (ريهام عبد الغفور) اللي عاوزه تحافظ على ورث أبوها، لكن طريقتها في الحفاظ على الميراث بتضع أسرتها كلها في مواقع درامية صعبة، وسط عالم من المكائد والدسائس اللي بيسحب المشاهد لمحاولة فك خيوطه.
بيشارك في بطولة “الأصلي” منال سلامة وأحمد الشامي ويوسف عثمان وطه خليفة.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
