The Definitive Guide to Living in the Capital , Cairo , Egypt

على الرغم من دوامة المط والتطويل اللي بتقع فيها كتير من مسلسلات رمضان، إلا أن مسلسل 7 ارواح كان على العكس من كل ده، رتم سريع ومشاهد مختصرة بتقدم جرعة كبيرة من التشويق والإثارة بشكل خلانا حاسين إننا مش قادرين ناخد نفسنا من سرعة تلاحق الأحداث اللى عماله تحصل كل شوية.. ده كان من أهم مميزات المسلسل، وبرضه من أهم عيوبه!

المسلسل بيحكي عن ضابط شرطة في آخر يوم له في العمل، من فترة قصيرة قدر يسلم واحد من أشهر رجال الأعمال لحبل المشنقة في قضية قتل ممثلة مشهورة، وقرر الإعتزال وهو على قمة المجد والتفرغ لقضاء وقت مع زوجته اللي حاسه طول الوقت أن عمل زوجها واخده منها.

مكالمة تليفون واحدة بتغير كل شيء، صوت مجهول بيطلب من بطلنا (خالد النبوي) أنه يقابله في مكان ما، الصوت لسيدة بنكتشف بعد كده أنها الفنانة اللي هيتشنق رجل الأعمال بتهمة قتلها، وأنها لسه على قيد الحياة وأن خالد النبوي ارتكب أكبر غلطة مهنية له بتسليمه متهم بريء لحبل المشنقه بيديه.

على الرغم من أن التيمة جديدة ومبتكرة، إلا أن القصة مش بتقف عند هنا وخلاص.. بنشوف جانب آخر من القصة من خلال مجموعة من رجال الأعمال زي كاريمان أو رانيا يوسف، ووليد فواز، وإياد نصار، واللي بتقوم بينهم معركة تكسير عظام للتنافس على تركة رجل الأعمال اللي بيتم تقديمه للإعدام، وبتتوالى الأحداث اللي مش عاوزين نحرقها عليكم.

في بداية مشاهدتنا للمسلسل حسينا أن الأداء التمثيلي للفنان خالد النبوي مش قوي، وإنه كان يقدر يقدم أداء أفضل من كده، لكن مع استمرار متابعتنا للأحداث ومعرفتنا بكتير من خلفيات شخصية النبوي في المسلسل -مش عاوزين نحرقها عليكم- عرفنا أن أداؤه التمثيلي عبقري يقترب من الكمال، وإننا فعلًا أمام ممثل عبقري قادر يقدم أداء استثنائي لشخصية ضابط الشرطة اللي شوفناها قبل كده من معظم فنانين وممثلين مصر.

وليد فواز بيكرر نفسه بطريقة أداءه اللي مش فارقة كتير عن دوره في مسلسلات كتير قدمها قبل كده أو حتى في سباق رمضان الحالي زي أزمة نسب أو الطبال على سبيل المثال.

رانيا يوسف بتقدم أداء شبه أداء شخصيات تانيه قدمتها، السيدة الجميلة اللي الكل بيحاول يوصل لها، لكننا بنراهن أن دورها هيشوف تطورات متميزة في الحلقات القادمة بالنسبة لشخصيتها، وبشكل عام المسلسل فيه تطورات كتير جدًا بنتوقع حدوثها وده اللي كنا بنقوله كعيب من عيوب المسلسل، وهو إن فيه كمية مفاجآت كبيرة جدًا بتخلينا كاتمين أنفاسنا خلال الحلقة الواحدة في مواقف كتير، ويمكن لو كانت التغيرات دي أقل شوية رتم المسلسل كان هيبقى مضبوط بنسبة 100%.

7 أرواح مش أفضل مسلسل في رمضان، لكنه بينافس بقوة، وأبطاله بيبذلوا قصارى جهدهم لأمتاع المشاهدين وده في رأينا أهم من أي لقب.