The Definitive Guide to Living in the Capital , Cairo , Egypt

على مدى 3 أيام وبحضور 600 لاعب، من أكتر من 26 دولة، وبحضور مشرف لمنتخبنا القومي، اختتمت النهارده بطولة بيروت المفتوحة للتايكوندو للناشئين والشباب والكبار، واللي استضفتها العاصمة اللبنانية “بيروت” في الفترة من 6 لـ 8 سبتمبر.

مشاركة مصر في البطولة كانت ملهمة ومميزة، وقدر منتخبنا خلال منافسات الكبار إنه يحصد 3 ميداليات فى اليوم الختامى للبطولة، بدأت بتتويج “صلاح خيري” بالميدالية الذهبية، وبعدها “عمر شراقي” بالميدالية الذهبية، وأخيرًا “تامر عبد المنعم” بالميدالية الفضية، ده غير حصوله على كأس أحسن روح قتالية وتكريمه من الاتحاد اللبناني. 

رجالتنا كانوا حصدوا 4 ميداليات تحت سن 12 سنة فى أول أيام البطولة، عن طريق مشاركة فريق أكاديمية عالم الرياضة، وكان منهم 2 دهب وواحدة فضة وواحدة برونز.

أما الناشئين والشباب فكان حظهم حلو في اليوم الثانى للبطولة، وقدروا يحصدوا 13 ميدالية تنوعت ما بين ذهبية وبرونزية وفضية، علشان يبقى إجمالي عدد الميداليات اللي حصل عليها منتخبنا أثناء البطولة 20 ميدالية.