Omar Abd-elmaqsoud
نظام الأكل عند كل واحد مننا بيختلف من شخص للتاني ومن وقت للتاني. لكن في الأغلب كلنا بندور على أفضل وأحسن نظام أكل وتغذية بشكل عام، وفي رمضان بشكل خاص. ده لإن رمضان ليه متطلبات غذائية مختلفة عن الأيام العادية، نتيجة إننا بنصوم لعدد ساعات طويلة. وأحياناً كتير بتكون درجة حرارة الجو عالية جداً. فبنحتاج نظام أكل يقدر يحافظ على أكبر قدر من الطاقة والسوائل في أجسمنا.
هنا بقى اتدخل خبراء التغذية علشان ينصحونا بأفضل أنظمة التغذية خلال شهر رمضان، ويقولولنا إيه أحسن أطعمة نحافظ على أكلها بالذات في وقت السحور. أو في الفترة ما بين الفطار والسحور.. تعالوا بينا نشوف قالوا إيه:
الحليب
– الحليب يعتبر أهم مصدر من مصادر الكالسيوم، ودي حاجة عارفينها من ابتدائي. لكن الجديد بقى إنك لو ضفت الحليب على أي نوع من أنواع الحبوب زي البليلة أو الشوفان، ده هيشكل وجبة سحور مثالية، تديك نشاط طول اليوم.
– بيساعد في زيادة الشعور بالشبع، وبالتالي بيساعد في التخلص من السمنة، ومشاكل الجهاز الهضمي.
– له تأثير لطيف على الحالة النفسية والمزاجية، والمحافظة على صحة وجمال البشرة، وبيخلصها من مظاهر الإرهاق اللي ممكن تبقى ظاهرة علينا أثناء الصيام، وبالذات في الصيف.
– فيه نوع من البكتيريا، بتقضي على الصداع النصفي اللي ناس كتير بتشتكي منه بسبب الصيام. ده غير كمان إن الحليب بيقلل مستوى الكولسترول في الجسم.
– الحليب خالي الدسم بيساعد في علاج حلات من التهابات القناة الهضمية، وبيحافظ على التوازن البكتيري في الأمعاء، وده بدوره بيساعد في توقف الإسهال، اللي بيبقى ناتج عن الاضطرابات الهضمية اللي بنتعرض لها في رمضان بالذات بسبب اللخبطة في الأكل.
السبانخ
– السبانخ يا سيدي صحيح كانت الأكلة المفضلة عند “باباي”، لكن كمان هي من الخضروات اللي فيها عناصر غذائية كتيرة ومفيدة جدًا للصحة العامة، زي الحديد والكالسيوم والمغنيسيوم والمنجنيز، ده غير فيتامينات “إيه” و “بي” و “سي”.
– لها دور كبير في خفض ضغط الدم، والوقاية من الإمساك، وبتظبط السكر في الدم، وبتظبط مستوى الحموضة في الجسم، وده طبعاً بيساهم في زيادة مستوى الطاقة في الجسم، وبيمنع زيادة الوزن في رمضان.
البيض
– البيض مصدر بروتين مهم جدًا جدًا، وأفضل طريقة علشان تستفيد منه هو إنك تاكله مسلوق على وجبة السحور. هتلاقي إنه بيساعدك في التقليل من الشعور بالعطش أو الجوع.
– له تأثير مهم على صحة الغدة الدرقية، وبيخلص الجسم من الخمول والكسل أثناء فترة الصيام. وبينهي تمامًا المشكلات المعوية وآلام البطن، سواء أثناء الصيام أو بعد الفطار. وده لو استمريت في أكله بشكل يومي.
الزبادي
طبعاً إحنا كمصريين مابنتوصاش في موضوع الزبادي ده، وبالذات في رمضان. ده لإنه واحد من الأطعمة اللي لازم تكون في الثلاجة باستمرار خلال شهر رمضان. سواء بقى هنستخدمه مع عصاير الفاكهة، أو هناكله كده لواحده.
ومن فوائد الزبادي، أنه فيه مادة الـ “بروبيوتك” اللي بتساعد في عملية الهضم. وبتزود مناعة الجسم. بيساعد على تنظيم حركة الأمعاء وبيخفف من حدة الإسهال، وده بيخلي الجسم يستفيد من الأكل. بيحافظ على الطاقة والانتعاش.
الخضروات
– مهم جدًا نحافظ على أكل الخضار الطازج ومهم طبعاً يكون مغسول كويس. ده لإن الخضراوات تعتبر من الأطعمة الأساسية اللي فيها نسبة كبيرة من الماء. ده غير فيتامينات “سي” و “بي” والكالسيوم وحمض “الكافيك”، اللي بيلعب دور في ترطيب الجسم.
– كمان الخضراوات غنية بالألياف، وده هيخليك تحس بالشبع لفترة أطول، وهيقلل الإجهاد والخمول.
التمر
– 3 تمرات في وجبة السحور أو تكسر بيهم صيامك هيدوا لجسمك كمية “الفركتوز” الطبيعي اللي بيحتاجها. ودي حاجة مهمة جدًا لنشاط الجسم. ده غير إن التمر فيه نسبة عالية من الألياف، بالذات الألياف غير القابلة للذوبان، والنوع ده من الألياف هوه الصحي للجهاز الهضمي ساعة الفطار، ده غير إنها بتلعب دور كبير في إحساسك بالشبع.
– التمر كمان علاج جميل للإمساك، بالأخص لو كان على شكل عصير، أما الألياف القابلة للذوبان في التمر، فبتخفض الكوليسترول في الدم، وبالتالي بتحمي القلب والشرايين.
الأسماك
– هتفضل الأسماك واحدة من أهم العناصر الغذائية، وده لإنها مصدر غني بـ “البروتين”، وهو مهم للصيام. بالذات للناس اللي عدوا سن الأربعين.
– في أبحاث علمية كتير أكدت إن أكل السمك بيحمي من الجلطات الدموية، وده لإن فيه أحماض أمينية، ده غير إنه بيحافظ على أنسجة الجسم.
– كمان السمك مش بيسبب تخمة أو زيادة في الوزن، وبالتالي يعتبر أفضل أكلة للصايمين اللي عايزين ينقصوا وزنهم خلال شهر رمضان، أو الصايمين اللي عندهم أمراض مزمنة.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
