The Definitive Guide to Living in the Capital , Cairo , Egypt

لو حبينا نحط عنوان لسنة 2019 فهيكون “سنة الإنجازات الرياضية” صحيح كرة القدم زعلتنا شوية بعد كأس العالم، لكن كرة اليد والاسكواش فرحونا كتير، والنهارده مع كايرو 360 جبنالكم إنجاز جديد فرحنا كلنا، بس المرة دي في “كرة السلة”.

فرحتنا النهارده هي “ثريا محمد الدغيدي” اللي على الرغم من إنها 24 سنة بس، إلا إنها النهارده بقت واحدة من أفضل اللاعبات المصريات في تاريخ كرة السلة، وقدرت إنها توصل لإنجاز ماوصلتش ليه أي لاعبة مصرية قبلها، وده بعد ما قدرت وبجدارة تاخد لقب أفضل لاعبة كرة سلة في أفريقيا لمدة سنتين ورا بعض خلال مراحل الناشئات والشابات تحت 16 و 18 سنة.

وفي بطولة أفريقيا للمنتخبات الأخيرة، قدرت “ثريا” تحصل على لقب “هدافة أفريقيا لكرة السلة” وبكدة تبقى أول لاعبة مصرية تاخد اللقب ده، بعد تسجيلها 85 نقطة، وبسبب ده أطلق عليها لقب “ثريا كيري” نسبة لـ “ستيفن كيري” نجم كرة السلة الأمريكية ودوري NBA.

طموح “ثريا” ما لهوش حدود، لكن أهم طموح حطاه  قدام عنيها خلال الفترة الجاية، هو الإحتراف بره مصر، خصوصًا إنها ضيعت فرصة قبل كده، لكن النهارده “ثريا” شايفة إن الخطوة دي جه وقتها زي ما قالت في حوار ليها مع “شبكة الرياضات المصرية”.

بداية “ثريا” في كرة السلة كانت وهي عندها 8 سنين في النادي الأهلي، وكانت ساعتها بتلعب سلة وتنس، لكن واحد من المدربين لاحظ موهبتها في السلة، فطلب منها تستمر، وتنبأ ليها بمستقبل كبير في اللعبة، وقد كان، انضمت “ثريا” لمنتخب تحت 16 سنة وبسرعة خدت لقب أفضل لاعبة في أفريقيا، ولما كبرت شوية ودخلت منتخب تحت 18 سنة، كان إنجازها التاني هوه لقب أفضل لاعبة كرة سلة أفريقية لمدة سنتين متواصلين.

 بعد كده شاركت “ثريا” مع المنتخب في 3 نسخ ورا بعض من بطولة أفريقيا، لحد ما حققت لقب هدافة البطولة بـ 85 نقطة وبفرق نقطة واحدة عن اللاعبة اللي بعدها، وده الإنجاز اللي اعتبرته “ثريا” الأكبر في مسيرتها الرياضية.