The Definitive Guide to Living in the Capital , Cairo , Egypt

صحة ولياقة

البرد في كايرو: 7 أنواع فاكهة وخضروات لازم نأكلهم أكثر في الشتاء

البرد في كايرو: 7 أنواع فاكهة وخضروات لازم نأكلهم أكثر في الشتاء
بواسطة
Hend Salah

القاهرة بـ تحب الأكل، والأكل كمان بـ يحب القاهرة، المشكلة أن كثير مننا بـ ينسوا أهمية أكل الأغذية الفريش في مواسمها، معظم دكاترة التغذية اتفقوا أن الأكلات الموسمية لها فوائد كثيرة لأنها بـ تكون طازجة وفي عزها، وغالبًا بـ تكون أرخص في السوبر ماركت ومحلات الخضار والفاكهة، جمعنا لكم قائمة تشمل أهم الأكلات الشتوية وطريقة استخدامها في وجباتكم اليومية.

 

البرتقال:

بصفته أهم فاكهة تحارب البرد اللعين، كان لازم فاكهة البرتقال العظيمة تكون رقم 1 في قائمتنا، البرتقال غني بفيتامين A و C والبوتاسيوم والألياف، وكمان بـ يحمي الجسم من الفيروسات ويقلل احتمال الإصابة بحصوات الكلى، ده غير تقليل نسبة الكوليسترول ويقال كمان أنها بـ تقاوم السرطان.

أحسن طريقة للاستمتاع بالبرتقال هي أكل البرتقالة سليمة، أو في كأس زجاج طويل مليان عصير برتقال فريش، وطبعًا فيه طرق كثيرة ندخلها في أكلاتنا، ممكن تعمل دريسينج لذيذ للسلاطة عن طريق خلط عصير برتقال مع بقدونس وعسل ومسطردة ديجون وخل بلسمي، أو تعمل طبق شوربة برتقال وجزر سبايسي ممتازة.

 

القرع:

صدقونا يا جماعة، القرع أهم بكثير من مجرد لبس للهالويين، كل الدكاترة بـ ينصحوا بالقرع لأنه مليان فيتامينات A، C، E وكمان غني بالألياف والعناصر الغذائية المفيدة، بـ يقولوا كمان أنه بـ يساعد على النوم، القرع مش من الحاجات المعتادة عند أغلب الناس، بس الحقيقة أن فيه طرق كثيرة جدًا لأكله، يعني مثلاً شوربة القرع هايلة وممكن كمان تعمل بسكويت القرع بالتوابل، ومهروسة البطاطا والقرع، أو ممكن تعمل فطيرة قرع بالقرفة.

 

الشمندر:

الشمندر غني بالمنجنيز والنحاس والحديد والفسفور، وهو معروف بقيمته الغذائية العالية وأنه كمان مصدر ممتاز لمضادات الأكسدة اللي بـ تساعد على تنقية الدم والكبد، صحيح كل فين وفين لما بـ نقابل الشمندر في الأكلات المصرية، بس النكهة المسكّرة للشمندر بـ تقربه أكثر للحلويات، أو بـ تعمل طعم لطيف للأكلات الحادقة، ممكن تستفيد بمميزات الشمندر بطريقة بسيطة وهي إضافته على السلاطة، بس الناس اللي مهتمة بالحياة الصحّية وأكلاتها بـ يضيفوه لمشروبهم الصباحي، غريبة مش كده؟ لو فكرت فيها هـ تلاقي الموضوع منطقي ومفيد.

 

العدس:

العدس حولنا طوال السنة، بس يفضل واحد من أهم الأطباق الشتوية، صحيح العدس مش من الخضروات بس كان لازم يكون معانا في القائمة، سعراته قليلة، وغني بالحديد والبروتين والمعادن، ويعتبر من أحسن الأكلات اللي تقدر تدفيك في أسقع الليالي الشتوية، من أسباب وجود العدس طوال السنة أن مكوناته المختلفة ممكن يتعمل منها حاجات كثير، يعني مثلاً ممكن بشوية بطاطا وتوابل وجزر وبقدونس مع العدس تعمل طبق لذيذ وهو شوربة عدس بالكاري، أو حتى لو شوربة عدس لوحدها برضه تمام.

 

الكاكا:

الكاكا تعتبر من الفواكة الرائعة الغنية بفيتامين A، C، EوB6، الكاكا كمان غنية بمضادات للسرطان وبـ تقلل أعراض الشيخوخة، وهي موجودة أكثر مما تتخيل في القاهرة، في الأول هـ تفتكرها نوع من أنواع الطماطم، بس لو أكلتها طازجة أو مجففة أو مطبوخة أكيد هـ تستمع بطعمها الرائع، من الأفكار العبقرية للكاكا استخدامها في عمل الشربات وكمان ممكن تلاقيها جاهزة في المكسرات المجففة.

 

اليوسفي:

لازم قبل ما نكمل كلامنا نتفق على حاجة، اليوسفي زيه زي الكلمنتين والماندرين مش مجرد "برتقالة صغيرة"، أيوه كلهم من نفس الفصيلة، بس طعمهم وقيمتهم الغذائية مختلفة، اليوسفي يشبه البرتقال، غني جدًا بفيتامين C وممكن يساعدك تتحمل السقعة، اليوسفي كمان مشهور أنه مفيد لحالات التهاب المفاصل وحماية البشرة، اليوسفي متوفر طوال الشتاء وممكن نعمل منه دريسنج خل للسلاطة أو بودينج يوسفي لذيذ.

 

الموز:

فاكهة ثانية متوفرة طوال السنة وهي الموز اللي تعتبر من أحسن الحاجات في الشتاء بسبب خواصها الغذائية المهمة زي البوتاسيوم وفيتامين C وفيتامين B-6 وغيرهم، الموز بـ يساعد على تحسين عملية الهضم وتخليص الجسم من السموم، ده غير أنه بـ ينتج السيروتونين –اللي بـ يعدل المزاج ويمنع الاكتئاب– وكمان بـ يحميك من أمراض السكر وسرطان الكلى، وفيه ناس بـ تقول أنه مضاد للاكتئاب كمان، ممكن نستخدم الموز في حاجات ثانية، يعني مثلًا نعمل منه سموزي أو نخلطه مع حبوب الفطار أو مع الزبادي أو البان كيكس، وطبعًا الحاجة المفضلة لنا وهي كيك الموز.

مقترح