The Definitive Guide to Living in the Capital , Cairo , Egypt

ساعات بـ نعمل كل حاجة عشان نتخلّص من شوية الوزن الزيادة، ب نعمل دايت ونلعب رياضة، وبعدين نعمل دايت أقوى ونتمرن أكثر، وفي الأخر بعد أسابيع من التمارين المجهدة والحرمان من الأكل نلاقي الميزان ثابت على موقفه. أكيد في أسباب كثيرة ممكن تعمل المشكلة دي، بس في حاجات سهل تعرفها وتتجنبها عشان تنزل الدهون دي.

بـ تتمرن صح بدون حساب كمية الكالوري في أكلك

أكثر ناس بـ تجوع هم المواظبين على التمارين. أغلب الوقت بـ يشوفوا أنهم تعبوا في التمرين وبالتالي محتاجين يستهلكوا كمية سعرات حرارية زيادة عن المطلوب. الفكرة أنك مهما كنت بـ تتمرن بـ الساعات، وجبة واحدة مليانة دهون ونشويات كفيلة أنها تضيَّع مجهودك كله في دقائق قليلة. خبراء التغذية بـ يشوفوا أنك كده "بـ تأكل كل السعرات اللي تخلصت منها خلال ساعات من التمرين". اعمل حسابك لما تتمرن بعد كده أنك بالكثير قوي هـ تحرق من 500 إلى 600 كالوري يوميًا، وعشان تحرق السعرات الزيادة أنت محتاج تأكل أكلات صحيّة تحافظ بها على مجهودك. أحسن حاجة ممكن تأكلها بعد التمرين هي الفواكه المجففة والمكسرات والموز والبيض والكيوي والأفوكادو، وأحسن المشروبات هي الماء وعصير البرتقال واللبن بالشوكولاتة والشاي الأخضر.

تمرينتك ثابتة طول الوقت

اتعملت دراسة عن عينة ناس بـ تتمرن نفس التمرين، وفعلًا العينة أظهرت أنهم فقدوا وزن في أول أسبوعين، وبعدها وزنهم ثبت تمامًا. الجسم البشري بطبيعته بعد وقت معين بـ يتعود على روتين التمرين لأنه بـ ينفذه بـ مجهود أقل، وبالتالي مفيش فائدة منه. نتائج العينة كمان قالت أن التمرين بنفس الروتين لفترة طويلة ممكن يسبب ضرر أكبر من نفعه.

تمارين الكارديو لوحدها بـ تفرز الكورتيزول وهو هرمون مسؤول عن مستويات التوتر في الجسم، الفكرة أن ممارسة الكارديو وقت طويل بـ تبدأ تقلل من كتلتك العضلية وبالتالي  جوعك بـ يزيد وبـ تبدأ تأكل أكل دسم.

برنامج تدريب غير متوازن

أي مدرب فاهم شغله دائماً بـ يعمل برنامج تدريب يشمل تمارين كارديو ورفع أثقال مع بعض، عشان الكارديو يحرق الدهون وفي نفس الوقت الأوزان بـ تضبط شكل جسمك. الدراسات قالت أن رفع الأثقال بـ يزود مستوى الحرق لمدة ممكن توصل لغاية 36 ساعة بعد التمرين، وده معناه أنك بـ تحرق سعرات بين كل تدريب والثاني، أما تمرينات الكارديو – اللي صحيح بـ تحرق سعرات كثير – بـ تخلي جسمك يخزن طاقته في صورة دهون عشان يقدر يستمر في التمرين.

الأكل الصح بالطريقة الغلط

كلنا عارفين الأكل الصحي عبارة عن إيه؛ اللي ناس كثير مش عارفاه أن الأكل الصح لما نستخدمه بطريقة غلط ممكن يدمر الجسم زي الأكلات الغير صحيّة بالضبط. نشرح لكم ب مثال: يعني لما تأكل سلطة عليها طبقة من المايونيز أو جبن كثير ده يعادل شريحة بيتزا، والأثنين كده طبعًا مش أكل صحّي – يا ريت نحسبها صح وبلاش نضحك على نفسنا. أكلات صحّية زي البطاطا لما نقليها في الزيت بـ تتشبع بكمية كبيرة من الدهون والسعرات. الأكل المسلوق أو المشوي أحسن كثير من المقلي، ولو حبيت تضيف نكهة معينة للأكل ممكن نستخدم الأعشاب والتوابل بدل البهارات.

وجبة نصف الليل

لو كنت بـ تحب تأكل متأخر، نحب نقول لك أن دي مشكلة كبيرة. الموضوع بسيط جدًا؛ وجبة أخر الليل بـ تزود الوزن أكثر من الأكل في أي وقت، عشان معدل الحرق بـ يكون أقل بالليل وخصوصًا وقت النوم. بلاش تأكل قبل ما تنام بـ فترة، أصل الفكرة أن في أخر اليوم المشكلة مش بس تأكل إيه، المشكلة في توقيت الأكل كمان.

نصيحة إضافية: اوعى تخاف تطلب مساعدة

حتى لو كنت بـ تعمل كل حاجة صح، ممكن جدًا متعرفش توصل للوزن اللي بـ تحلم به. الجسم البشري يا جماعة معقد جدًا وصعب الفهم. يجوز الموضوع متعب شوية لبعض الناس، بس من الحاجات اللي ممكن تساعدك هي تقييم لجسمك في الجيم بحيث تعرف المطلوب منك وتنفذه صح. كمان ممكن تطلب رأي الدكتور عن أنسب الطرق لتنزيل الوزن.

من مجموعة مقالات من: دايلي ميل وفيتنيس ماجازين وذا أتلانتيك وبازفيد.