The Definitive Guide to Living in the Capital , Cairo , Egypt

صحة ولياقة

بعد إجازة العيد.. 5 نصائح للعودة للعمل بدون تعب أو توتر

الرجوع للعمل من جديد العودة للعمل بعد الإجازة نصائح بعد الإجازات نصائح للعودة للعمل
بعد إجازة العيد.. 5 نصائح للعودة للعمل بدون تعب أو توتر
بواسطة
Mohamed Talaat

العيد خلص! كانت إجازة جميلة ومليانة فرحة، ومن بعدها لازم نرجع تاني للشغل، وننتج ونجتهد علشان نقدر ننجح في حياتنا.. وعلشان نقدر نندمج من جديد في الشغل من غير توتر أو تعب، هنقول لكم على 5 نصائح سريعة.. يلا نعرفهم مع بعض.

نظم نومك من جديد

بصفة عامة، الناس بتحب تسهر في الإجازات لحد الصبح، وده طبعًا أمر مش صحي، وغير مناسب لأيام العمل، وده سبب رئيسي بيخلي ناس كتير مش قادرة ترجع بسلام للشغل من تاني، علشان كده مهم ترجع من تاني تدرب نفسك على النوم بدري، لأن الشعور بالتعب الجسدي والإرهاق في العمل هيزود من مزاجك السلبي، ده غير إنه هيزود كمان من تدهور إنتاجيتك، لما ترجع تنام بدري وتصحى بدري، تجربة رجوعك للشغل من جديد هيمر بسلام.

قلل من الضغط والتوتر خلال ساعات العمل

بالتأكيد لما بترجع من الإجازة هتلاقي مهام كتير كانت متعطلة ولازم تنجزها كلها، لكن مهم تفهم إنك مستحيل هتقدر على القيام بكل المهام في اليوم الأول من العودة، علشان كده من المهم إننا نتقبل الحقيقة دي، ونحدد الأولويات، ونعمل خطة عمل بدون ضغط أو توتر.. وواحدة واحدة الدنيا هترجع تظبط من جديد.. ومن غير توتر.

اشرب قهوتك في ميعادها

لما ترجع الشغل من جديد، حاول ترجع لروتينك مرة تانية، يعني مثلًا لو كنت بتشرب قهوة الصباح في ميعاد معين استمر في الموضوع ده، بالإضافة إلى تناول إفطارك المعتاد، وكل العادات دي لما ترجع تقوم بيها تاني في الميعاد الصح هتساعدك على الاندماج في الشغل بشكل أسرع.

فكر نفسك بمهام شغلك

ممكن تلاقي نفسك ناسي بعض التفاصيل في الشغل، وده أمر طبيعي بعد إجازة طويلة نوعًا ما، وعلشان كده من الضروري إنك تعمل قائمة مهام “to do list” ترجع لها علشان تفكرك بسهولة بكل اللي لازم تفضل فاكره من خطوات وتفاصيل العمل.

ما ترجعش من السفر على الشغل على طول

فيه ناس بترجع من السفر على الشغل على طول، وده أمر سلبي جدًا، لازم ترجع من السفر قبل يوم واحد على الأقل من عودتك للعمل، علشان يكون عندك فرصة للاسترخاء قبل العودة للعمل مرة تانية. فكرة الرجوع من السفر صباح أول يوم شغل فكرة سلبية جدًا.. ننصحك تبعد عنها.

مقترح