The Definitive Guide to Living in the Capital , Cairo , Egypt

الفيديو والصورة الرئيسية للمصور: أحمد زيزو

تفتكر ممكن؟ الحقيقة إنه آه، ممكن جدًا كمان، ممكن تكون صاحب حلم بعيد أو قريب، وممكن كمان تكون صاحب همة وعزيمة علشان تحققه، ووارد إن الظروف تساعدك كمان في إن حلمك في لحظه يبقى بين إيديك، لكن اللي مش ممكن وصعب هوه إنك تحافظ على الهمة والعزيمة دي، وتعاكسك الظروف كمان، ومع ذالك توصل لحلمك من أوسع أبوابه. 

ده تحديدًا اللي عمله بلال جابر اللي قعد ١٢ سنة من عمره إنسان طبيعي، ليه أصحاب بيلعب ويخرج معاهم، ويشاركهم نفس الاهتمامات والأحلام، لحد ما قرر القدر وتبقى الظروف عكسه تمامًا، ويحصله حادثة تغير مسار حياته بشكل جذري.

حادثة قطر كانت سبب في إن بلال يفقد ساقه الشمال، وبرغم قساوة الحادثة، إلا إنها كانت درس اتعلم منه بلال إنه يبقى زي القطر ده في طريقه لحلمه، ومايسبش أبدًا قضبان الأمل والعزيمة لحد ما يوصل له، وده اللي حصل بالضبط.

قدر بلال يعدي أول محطة في مشواره التعليمى بتفوق، وجاب ٩٤٪  في علمى رياضة، ودخل كلية علوم، لكن المشوار ماكانش سالك زي أوله وقابل مطبات كتير، فبعد ما سقط في كلية علوم، وحظه كان وحش كمان في كلية الفنون الجميلة قسم عمارة قرر يجرب نصيبه في كلية الحاسبات والمعلومات، جايز تكون بوابة لحلمه، إلا أنه حس إنه مش هيقدر يكمل فيها، فقرر يوقف في محطته الأخيرة في مشواره ده في كلية التربية قسم الكيمياء، لحد ما خد الشهادة.

ومع المشوار التعليمى الطويل ده، واللي كله مطبات، ما أستسلمتش بلال لظروفه، ولقى فى ألعاب القوى وكمال الأجسام رياضته وشغفه وحلمه، فبدأ يوجه قضبان حلمه للصالات الرياضية المتخصصة علشان يبنى جسمه.

أهل بلال كانوا ضد شغفه ده، وكان السبب في ده زي ما بيقول بلال إنه كان بيرجع من الجيم مكان البتر كله دم ومجروح عشان كان بيشيل أوزان كبيرة، ورجله ما كانتش واخدة على التقل ده، لحد ما بدأ يتعود.

كانت مسابقات رفع الأثقال زي رجوع الروح لبلال، فشارك فى عدد من المسابقات على مستوى الجمهورية، وفاز بالميدالية البرونزية، وخد المركز الأول فى مسابقات جامعات مصر لرفع الأثقال.

العزيمة والثقة اللي عند بلال كانت بتزيد يوم بعد يوم، وقدر إنه يلفت الانظار ليه، لكن في نفس الوقت بلال شايف إن في ناس كتير بعد ربنا كانت سبب في قصة نجاحه وتحقيق حلمه ده ومنهم الكابتن أحمد التركي اللى ساعد بلال بعد كده في إنه يكون مدرب فى أكبر جيم فى مصر.

بلال دلوقتي بيسعى إنه ياخد دبلومة، علشان يبقى مدرب جيم “معتمد دوليًا ” فى اللياقة البدنية.