The Definitive Guide to Living in the Capital , Cairo , Egypt

على الرغم من أن السن أو الضرس اللي بيخسره الإنسان البالغ مش بيقدر يعوضه تاني، وعلى الرغم من ارتفاع أسعار تركيبات الأسنان والأسنان الصناعية، وعلى الرغم من أن زيارة دكتور الأسنان بتكون مهمة شاقة ومخيفة على كتير منا، إلا أن كتير من الناس لسه مش عارفة القواعد البسيطة والمهمة اللي ممكن من خلالها نتجنب كتير من أمراض الأسنان واللثة، ونوفر على نفسنا وقت وجهد وفلوس كتير.

الدكتور محمود صلاح رفاعي، أخصائي تجميل الأسنان وعضو الأكاديمية الأمريكية لتجميل الأسنان كتب من فترة مجموعة تويتات على تويتر بيعطي فيها نصايحه للناس اللي عاوزه تتمتع بأسنان صحية ونظيفة. تواصلنا معاه وقررنا نسمع منه أكتر وننقل لكم التجربة بالكامل.

د. محمود قال لنا:

Halitosis أو ما يعرف برائحة الفم الغير مرغوب فيها ده مرض اللي بيعاني منه بيحس إن ريحة فمه مش كويسة، وبتأثر على نفسية صاحبها تلاقيه خايف يتكلم، ودايمًا بيبعد علشان خايف حد يتضايق أو ياخد باله من الريحة دي.

الرائحة دي ممكن تدل على مشكلة بسيطة أو عرض لمرض خطير. مش قصة آخرها باكو لبان وخلاص.

 إحنا بنقسم المرض لتلات أنواع:

• حقيقي (وده فعلًا معناه إن عندك مشكلة)
• كاذب (أنت حاسس إن عندك مشكلة والدكتور مش لاقي سبب ليها)
• هوس أو فوبيا (إحساسك بالمشكلة مستمر حتى بعد العلاج)

أسبابه: فيه أسباب متعلقة بالفم، وأسباب تانية غير متعلقة بالفم.

الأسباب المتعلقة بالفم زي: التدخين، المشروبات الكحولية، أمراض اللثة، تسوس الأسنان، تكون طبقات الجير والبلاك على الأسنان، عدم الاهتمام بغسيل الأسنان، عدم الاهتمام بنظافة أطقم الأسنان المتحركة،  التركيبات الثابتة اللي مش مضبوطة.

الفينييرز أو ما يعرف باابتسامة هوليوود لما ماتسمحلكش بنظافة أسنانك كويس خصوصًا لما تمنعك من استخدام خيط الأسنان كويس ٠

نوع الأكل (السكريات والنشويات والحلويات ..).

عدم استخدام خيط الأسنان خصوصًا بعد الأكل مباشرة.

حالات الخلع الجراحي أو بعد أي علاج جراحي للفم.

وأخيرًا، أمراض الفم زي التقرحات، جفاف الفم، التجمعات الدموية.

وأهم سبب متعلق بالفم هو عدم نظافة اللسان خصوصًا أنه أكبر مكان تتجمع فيه البكتيريا داخل الفم في الجزء الخلفي للسان.

أما الأسباب غير المتعلقة بالفم فهي:

جفاف الفم نتيجة لأمراض المناعة والعلاج الإشعاعي أو الكيماوي …إلخ وبعض أمراض المناعة أو الأعراض الجانبية لبعض الأدوية أو بعض أمراض السرطانات وأمراض الدم ومشاكل المعدة أو حتى أمراض الجيوب الأنفية وارتجاع المرىء.

أما لو كانت رائحة الفم نفاذة جدًا وشبه رائحة  الأسيتون ممكن تكون علامة على ارتفاع معدل السكر في الدم أو حموضة الدم.

بعد كده سألنا د. محمود.. نعمل إيه لو حد نبهنا لريحة فمنا الكريهة أو لاحظناها بنفسنا؟ قال لنا:

طبيب الأسنان هو أول واحد تروحله للمشكلة دي علشان يشوف لو المشكلة من الفم أو بره الفم فيستحسن أول حاجة تعملها تزور طبيبك.

وبالنسبة للحلول المقترحة للمشكلة.. أول وأهم الحلول هي تظبيط نظام الأكل وكل ما كان الأكل فيه نسبة الياف أكثر زي الخضروات مثلًا، كل ما كان أفضل، أما لو هتاكل حلويات يجب غسيل الأسنان بالمعجون بعدها مباشرة.

كمان لازم نواظب على مسح اللسان باستمرار لانه من أكتر الأماكن اللي بتتجمع عليها البكتيريا المسببة للرائحة الكريهة، لكن بلاش نمسح اللسان بعنف علشان مايسببلناش مشاكل.

من أهم الأمور استخدام خيط الأسنان بطريقة صحيحة بعد كل وجبة، ونحاول نبعد عن استخدام خلة الأسنان علشان بيكون لها أثار جانبية أسوأ.

من أهم الأمور شرب كميات كبيرة من المياه على مدار اليوم، وتناول اللبان بدون سكر، وبعض أنواع اللبان الطبي بدون سكر واللي بتمنع التسوس بالإضافة لتحسينها رائحة الفم.

ولو بتستعمل فرشة الأسنان باستمرار ضروري تغيرها مرة واحدة كل شهر على الأقل علشان تضمن عدم تكون بكتيريا عليها.

فيه منتجات زي مضمضة أو معجون أسنان فيه مادة chlorhexidine دي ممتازة في مقاومة البكتريا بس ماتستخدمهاش أكتر من أسبوعين عشان ماتعملش صبغة على أسنانك أو على اللثة.