The Definitive Guide to Living in the Capital , Cairo , Egypt

الدعم النفسي مهم جدًا في الفترة دي، وخاصة عند الشباب، وبما أن حالات الوحدة والاكتئاب انتشرت مؤخرًا في بلدنا لأسباب مختلفة، قرر شاب مصري، وهو خالد العناني، إنه يطلق تطبيق جديد اسمه “دعم” لمساعدتكم على التخلص من مرض الاكتئاب والوحدة والضيق، من خلال إنه بيوفر لكم فرصة الكلام مع ناس تانيين.

التطبيق في مجمله مميز وحصل في فترة وجيزة على 5 نجوم كتصنيف عام على منصة جوجل بلاي، وبدأ يحقق نجاح كبير في الفترة الأخيرة بين كتير من شباب مصر.

وبيعتبر تطبيق دعم منصة بتخليكم تشاركوا مشاكلكم وتلاقوا دعم من المشاركين التانيين بشكل مجهول بدون معرفة الهوية، كل اللي عليكم أنكم تنشروا المشكلة والتصنيف المناسب ليها، وبعدها تنتظروا الردود أو تتفاعلوا مع أصحاب المشاكل التانية في التطبيق، وطبعًا هتلاقوا ردود فعل إيجابية على أي مشكلة محتاجة للدعم.

المميز في الموضوع أن كل حاجة في التطبيق مجهولة، يعني ماحدش هيعرف شخصية صاحب المشكلة أو حتى مين اللي بيقدم الدعم، علشان الخصوصية، والحفاظ على سرية المناقشات، ودي من أكتر الحاجات اللي عجبتنا في التطبيق.

مؤسس التطبيق خالد العناني بيدرس في كلية طب أسيوط، ومن محافظة سوهاج، وقال في تصريحات خاصة لموقع كايرو 360 إن فكرة التطبيق جت له لأنه كان محتاج يتكلم مع حد قبل كده، لكن للأسف مالقاش حد يتكلم معاه، فقرر أنه يعمل التطبيق ده علشان أي حد محتاج يتكلم يلاقى اللي يساعده ويسنده، ووضح كمان إنه على الرغم من أن التطبيق جديد ويادوب انطلق من أيام لكن حمله لحد الآن أكتر من 1100 شخص.

أما عن طريقة استخدام التطبيق فهي سهلة جدًا لأنكم بتحملوه من جوجل بلاي، وبتدخلوا تسجلوا حساب جديد في 3 خطوات، بعدها بتفتح معاكم الصفحة الرئيسية، وتقدروا تضيفوا مشكلة وتصنفوها ما بين 7 تصنيفات مختلفة، أو تردوا على مشاكل تانية، وفي كل الحالات مش هيظهر غير صورة مبهمة، واسم الأكونت هيكون “Anonymous”.

وعلشان تحملوا التطبيق لأجهزة أندرويد من هنا.

وتقدروا تعرفوا أكتر عن التطبيق من خلال صفحة الفيسبوك من هنا.