The Definitive Guide to Living in the Capital , Cairo , Egypt

بعد انتشار فيروس “كورونا” المستجد على مستوى العالم، واللي أصاب أكتر من 6 مليون إنسان، أعلنت الحكومة المصرية ضمن إجراءتها الاحترازية لمواجهة الفيروس أن ارتداء الكمامة أصبح أمر إجباري في الأماكن العامة، وعلشان الكمامة تكون حماية حقيقية لكم، هنقولكم على طريقة لبس الكمامة زي ما وضحتها وزارة الصحة المصرية.

أولًا الكمامة لازم تكون طبية علشان تأدي الغرض منها، وعلشان تلبسوها لازم تغسلوا إيدكم الأول بالمياه والصابون، وبعدين تشوفوا الشريط المعدني أو الطرف المقوى وتخلوه من فوق على الأنف وتثبتوه كويس، ولازم تكون الجهة الملونة هي اللي بره، واتأكدوا أنكم غطيتوا الفم والمناخير والدقن كويس، ومافيش فراغات.

بعد ما تلبسوا الكمامة وتخرجوا ماتلمسوهاش خالص بإيديكم، ولما تيجوا تقلعوها لازم تقلعوها من خلال الأستك أو الرباط اللي على الودن، وخلوها بعيد عنكم وعن أي سطح، وتترمي بعد الاستخدام في سلة المهملات وطبعًا الأفضل انها تتحط في كيس، وبعدها ترجعوا تغسلوا إيديكم كويس بالمياه والصابون.

وكمان وزارة الصحة حذرت من استخدام أي كمامة مقطوعة، ولازم يكون مقاسها مظبوط، وماتلمسوش الكمامة نهائيًا، وبلاش تقلعوا الكمامة علشان تكلموا حد، اتكلموا وأنتم لابسينها، وماحدش يسيبها في أماكن سهل حد يلمسها أو يوصل لها، وكمان ممنوع انكم تستخدموها مرة تانية لأنها بتستخدم مرة واحدة بس.