The Definitive Guide to Living in the Capital , Cairo , Egypt

بسرعة خلص شهر رمضان وبعد أيام هيبدأ العيد، وبعد تعود معدتنا على الأكل في أوقات معينة وبكميات معينة في شهر رمضان بينصح كثير من الدكاترة إننا نبدأ ندخل الأكل بالراحة على المعدة، وما نفاجأهاش بكميات ضخمة من الأكل، لأن ده مضر بيها.

موقع فيتو نشر موضوع عن أكلات معينة مهم نتجنبها أول يوم العيد علشان صحتنا، والأكلات دي هي:

 

الدهون والأسماك

الدكتور أيمن شحاتة المدرس بكلية الطب بجامعة طنطا، نصح بأنكم ما تكلوش أكل فيه دهون كتير أول يوم العيد، والكلام إللي جاي ده ممكن يزعل ناس كتيير بس هو كمان نصح بأنكم ما تأكلوش المخبوزات الخاصة بالعيد زي البسكويت والكحك والسكريات الكتير، مش لازم أول يوم يعني يا جماعة.

كمان لو مصممين تاكلوا رنجة أو فسيح أو أي أنواع أسماك تانية يبقى مهم تاكلوا كميات قليلة جدًا.

 

التوابل والسوائل

ود. شحاتة  أكد على أنه مهم جدًا أكل الفاكهة أول أيام عيد الفطر، زي التفاح والجوافة ويا ريت ماتشربوش كميات كبيرة من المياه والسوائل علشان مايجلكمش تلبك معوى، كمان يا ريت ماتكلوش التوابل بكثرة علشان معدتكم ماتتعبش، وبرضه يفضل ماتشربوش مياه غازية بكمية كبيرة، علشان ما تتعرضوش للإسهال السريع.

 

السمين والضاني

أما الدكتور محمد محمود مدير مركز السموم بقصر العينى في القاهرة فقال إن أكتر حاجة بتتعب وترهق الناس أول أيام عيد الفطر المبارك، هو كمية الأكل اللي بياكلوها في اليوم الأول من العيد، كمان الإنسان اللي جسمه سليم ممكن يستحمل ولكن المشكلة أن المرضى لازم ياخدوا بالهم لأن جسمهم مش هيستحمل، وبرضه الحامل والأطفال وكبار السن.

وأكد د.محمد محمود على إن كميات الأكل لازم تكون قليلة في اليوم الأول بعد الصيام، ونبعد طبعًا عن الأكلات السمينة والمسبكات والضاني، ولا ينصح بتناول الرنجة  لأن المعدة في اليوم الأول مش محتاجة  ضغط عليها لأن ممكن الإنسان  يتعرض للقيء والتسمم، وبرضه نبعد عن الموالح.

السكريات

كمان الدكتور أحمد صلاح المدرس المساعد بكلية طب قصر العينى نصح بالابتعاد  تمامًا عن السكريات والمعجنات في اليوم الأول من الإفطار، زي الكعك والعجوة والملبن والشيكولاتة، ولازم تنظموا أكلكم في الأيام الأولى من العيد علشان تتعود المعدة بعد كده على النظام الجديد.