The Definitive Guide to Living in the Capital , Cairo , Egypt

بملامح مصرية أصيلة، وابتسامة تخليك تحبه، ومهارات حقيقية بتدل على مجهود كبير.. دخل السباح المصري “عمر سيد شعبان” مؤخرًا موسوعة “جينيس” العالمية للأرقام القياسية، بعد تحقيقه رقم قياسي لأعلى قفزة خارج الماء بارتداء زعانف المونو بارتفاع مترين و30 سم، وبالقفزة دي حطم “شعبان” الرقم القياسي السابق، مترين و5 سم، المسجل باسم كل من البطل المصري سيد الباروكي، وبطل العالم الإيطالي استيفانو فيدجيني.

“عمر سيد شعبان” أبهز القائمين على موسوعة “جينيس” بمهاراته الفائقة، ونجح في إنه يخلي وسائل الإعلام المصرية والعربية والعالمية تتسابق في الكتابة عن حكايته، خصوصًا إنها حكاية بتعبر عن إرادة وقوة وإصرار ونجاح.

بيحكي “عمر سيد شعبان” وبيقول إنه كان بيحلم بدخول موسوعة “جينيس”، وعرض الأمر على العقيد محمد مسلم رئيس منطقة الإسماعيلية للغوص والإنقاذ، وبعدها تم التواصل مع الاتحاد المصري للغوص والإنقاذ ووزارة الشباب والرياضة، اللي خاطبوا بدورهم الموسوعة العالمية لتحديد الميعاد اللي هيحاول فيه “عمر” كسر الرقم.

وفي حواره مع قناة سكاي نيوز عربية اتكلم “عمر” عن مشاعره يوم الفعالية اللي شهدها استاد القاهرة الدولي، وحكى إنه كان جواه مزيج من الأمل والخوف، ووف المشهد بإنه كان مهيب، خصوصًا وإنه كان حاضره وزير الشباب والرياضة ووسائل الإعلام المختلفة، وأسرته وأصدقائه في الإسماعيلية، مسقط رأسه، فكان خايف من الفشل في اليوم ده.

بعد نجاحه في مهمته، وكسر الرقم، شعر “عمر” بسعادة كبيرة، بعد ما شاف البهجة على وجوه كل اللي حواليه، واللي قال إنهم  أصروا على الحضور رغم الطقس السيء في اليوم ده.

كمان أكد السباح المصري، اللي عمره 21 سنة، أن تحقيق الرقم القياسي، احتاج منه حوالي 8 أشهر من التدريب تحت إشراف مدربه محمود فتحي، وأن القفز خارج الماء بارتفاع مترين و30 سم، كان أمر صعب جدًا بسبب مقاومة الماء والجاذبية الأرضية ووزن زعانف “المونو” اللي بتوصل لحوالي 6 كيلو.

وبتعتبر دي هي المحاولة الأولى لعمر لكسر الرقم القياسي السابق.

يُذكر أن شعبان، شارك عام 2015 ببطولة كأس العالم للأندية، وحصل على كأس أفضل سباح ببطولة الجمهورية في عامي 2016 و2019. وفى التصنيف العالمي، صنف ثانيًا في الـ50 متر لعام 2017، والثاني عربيًا، وفي عام 2018 حصد كأس أحسن مرحلة.

وبدأت رحلة عمر في تعلم السباحة، وهو في الثامنة من عمره، بطلب من والدته، اللي كانت بتحاول زرع حب الرياضة في قلبه.

وبيحاول شعبان أنه يقسم وقته بين التدريب والدراسة، لإنه بيدرس حاليًا الهندسة المدنية، وباقي له سنتين بس على التخرج.

وأخيرًا.. بيحلم عمر سيد شعبان إنه يكون أسرع سباح في العالم، وهو واثق بإذن الله إنه هيحجز لنفسه مكان جديد في موسوعة “جينيس” باللقب ده.. وإحنا في كايرو 360 بنتمنى له كل النجاح في تحقيق حلمه.