The Definitive Guide to Living in the Capital , Cairo , Egypt

الفيسبوك مؤخرًا مقلوب خاصة في الجروبات الخاصة بالأمهات، مافيش حد ما بيتكلمش عن فيتامين د – Vitamin D وأهميته وأعراض نقصه وكله عمال يسأل عن الأماكن اللي بتعمل التحليل وبكام، أينعم التحليل ده موجود من زمان لكن علشان فيه ناس كتيرة لقيت أن عندها أعراض نقصه فاهتموا وبدأوا يركزوا معاه.

لازم قبل أي حاجة نعرف معلومات عن فيتامين د، الفيتامين ده موجود بشكل أساسي في ضوء الشمس، وبالتالي الناس اللي مش بتتعرض للشمس كتير أو ما بتخرجش زي أغلب الأمهات بعد ما بتخلف أكيد هيكون عندها نقص فيتامين د، كمان اللي بشرته غامقة بيكون محتاج يقعد في الشمس أكتر من اللي بشرته فاتحة علشان جسمه يستفيد منه.

أما في الأكل نسبة فيتامين د قليلة جدًا هتلاقيها في الأسماك وزيوتها والبيض والمشروم، ولازم أكلنا يكون فيه نسبة دهون لأن فيتامين د بيذوب في الدهون، ودوره مهم لامتصاص الكالسيوم والحديد والماغنسيوم والفوسفات والزنك من الأكل في الأمعاء.

طب هو ليه مهم؟ لأنه مسؤول عن سلامة العظام (بيحمي من الكساح ولين العظام) وسلامة الأعصاب (نقصه بيسبب اكتئاب أو أن الشخص يكون عصبي بزيادة) وسلامة المناعة (علشان كده نقصه بيزود نسبة إصابتنا بالسرطان) وسلامة الهضم وضغط الدم والعضلات.

اللي لاحظناه أن التحليل ثمنه غالي في أغلب المعامل بس بتستلم النتيجة في نفس اليوم أو ثاني يوم، ويُفضل علشان يكون ثمنه رخيص أن مجموعة كبيرة تروح تعمله علشان النتيجة بتطلع مرة واحدة، ولو لقيته في مكان ثمنه أقل بتستلم النتيجة بعد 3 أو 4 أيام، يوم التحليل بتروح تعمله على طول ومالوش شروط صيام أو تجهيزات خاصة، وبعد ما تستلم النتيجة لازم تروح لدكتور عظام علشان يقول لك على الـ Supplements (المكملات الغذائية) المناسبة لك لو نسبته منخفضة، ما تاخدش أي أدوية مع نفسك وخلاص.

معامل البرج:

سعر التحليل 860 جنيه، ومواعيدهم من 8 صباحًا: 11 مساءً، عندهم تخفيضات لو أنت تابع لنقابات أو شركات رعاية طبية، لو عملت التحليل قبل الساعة 2 ظهرًا ممكن تستلمه في نفس اليوم من الساعة 9: 10 بالليل، ولو بعد الساعة 2 هتستلمه تانى يوم، ماعدا لو عملته يوم الخميس هتستلمه السبت، وبرضه لو عملت التحليل يوم الجمعة هتستلمه السبت، الخط الساخن 19911.

معامل المختبر:

سعر التحليل 860 جنيه، وعندهم خصومات لو أنت تبع جهات خصم أو نقابات، نفس النظام لو عملت التحليل قبل الساعة 2 تستلمه في نفس اليوم بالليل من الساعة 9: 11 مساءً، ولو بعدها تستلمه تاني يوم، مواعيدهم كل يوم من الساعة 8 صباحًا: 11 مساءً، وعندهم خدمة سحب عينات من المنزل، ممكن تعرف الفروع من موقعهم على الإنترنت، والخط الساخن 19014.

معامل ألفا:

سعر التحليل 880 جنيه، لو عملت التحليل قبل الساعة 1 ظهرًا بتستلمه في نفس اليوم بالليل، بعد الساعة 1 بيبقى تاني يوم، شغالين كل أيام الأسبوع، ويوم الجمعة فيه سحب عينات بس مافيش تسليم نتايج تحليل، مواعيدهم من 9 إلى 10:30 مساءً، ممكن تعرف فروع ألفا وتليفوناتهم من موقعهم الإلكتروني، والخط الساخن 16191.

معامل الشمس:

سعر التحليل 680 جنيه، وفيه خصومات لبعض النقابات والشركات، لو عملت التحليل قبل الساعة 1 ظهرًا ممكن تستلمه في نفس اليوم بالليل، بعد الوقت ده تستلمه تاني يوم، مواعيد العمل من 8 صباحًا: 11 مساءً، الأجازة يوم الجمعة، الخط الساخن 19445.

IBN HAYAN Labs:

سعر التحليل 800 جنيه، والنتيجة بتظهر أيام السبت والاتنين والأربعاء، وعندهم تخفيض لأعضاء نقابة المهندسين بس، رقم التليفون 01027444591.

مستشفي 57357:

مستشفي 57357 وفرت التحليل يوميًا من الساعة 8 صباحًا لحد 8 مساءً، التحليل قيمته 200 جنيه ونتيجته تقدر تستلمها خلال 3 أيام، وفلوس التحليل بتروح تبرع للمستشفى.

ممكن تعرف معلومات أكتر عن فيتامين د من خلال موقعهم هنا، والخط الساخن للمستشفى 19057.

مؤسسة بهية:

سعر التحليل 300 جنيه وبتستلمه بعدها بـ 4 أيام، هما شغالين من 9 صباحًا: 8 مساءً ماعدا الجمعة والأجازات الرسمية، عندهم خصومات تبع النقابات بتعرفها لما بتروح هناك، أرقام العيادات: 0233927460 – 0233927468 – 0233927521 والخط الساخن 16602.

مستشفي دريم لاند:

سعر التحليل ٢٠٠ جنيه لو اتجمع ١٠ أشخاص في نفس الوقت يحللوا، المواعيد قبل الساعه ٣ عصرًا كل يوم ماعدا الجمعة، إحنا حاولنا كتير نكلمهم نعرف تفاصيل زيادة بس ما بيردوش على كل الأرقام، مش عارفين لو حد تعبان أو بيموت هينجدوه إزاى!!

أرقام التليفون: 0238580436 – 0238580436 والخط الساخن 19351.