Cairo 360
الصيف داخل ومعاه بتيجي مشاكل الحر والكتمة في الأماكن المقفولة. وطبعَا مشاكل رائحة العرق. اللي لوحدها كفيلة تقفل اليوم من أوله. علشان كده هنقول لكم على أهم النصائح اللي تخلصكم من ريحة العرق غير المرغوبة:
1- النظافة الشخصية
دي طبعًا رقم واحد طول السنة، مش في الصيف بس. عدم الاهتمام بالنظافة الشخصية هو السبب الرئيسي للرائحة الكريهة. الاستحمام بشكل مستمر يوميًا ضروري جدًا. وأحيانًا في الصيف بنحتاج نستحمى أكتر من مرة في اليوم.
2- مزيل العرق
ده مرتبط برقم واحد ارتباط تام. الاستحمام مهم، بس ضروري معاه استخدام مزيل العرق. اللي بيخلي ريحة الجسم حلوة في حالة التعرق. وتقدر تستشير الصيدلي في النوع الملائم لبشرتك.
3- نظافة الملابس
زي ما نظافة الجسم مهمة، نظافة الملابس برضه مهمة. لأنها ممكن تسبب ريحة كريهة في الحر. وكمان نوع الأقمشة مهم، يُفضل ارتداء الملابس القطنية اللي بتمتص العرق. ونبعد عن أنواع زي البوليستر اللي بتضاعف التعرق.
4- النظام الغذائي
أطعمة زي الثوم والبصل بتسبب ريحة كريهة. وده لاحتوائها على مركبات السلفر، اللي بيتم إفرازها من مسام الجلد بروائح غير مرغوبة. وكمان الأطعمة اللي بتحتوي على زيت التيربين زي الطماطم والجوافة. التوابل والكافيين بيزودوا التعرق. علشان كده لازم ما نكترش من الأطعمة دي في وجباتنا اليومية.
5- التمارين الرياضية
ضروري تدعيم النظام الغذائي بالتمارين الرياضية. خلال مدة التمرين بتزيد عملية التعرق، وده بيخلص الجسم من السموم المتراكمة. طبعًا بعد التمرين الاستحمام مهم جدًا، وكمان غسل ملابس التمرين.
6- إزالة الشعر الزائد
كثافة الشعر في منطقة الإبطين، بتقلل من تبخر العرق. وده بيخلق بيئة رطبة بتسمح بتكاثر البكتيريا والفطريات. علشان كده التخلص من الشعر الزائد أمر مهم جدًا.
7- شرب المياه كتير
صحيح كتر شرب المياه بيزود التعرق، لكن في نفس الوقت بيخلص الجسم من السموم ويمنع نمو بكتيريا الأمعاء. من 8 لـ 10 أكواب مياه، هتساعدك على الحصول على جلد صحي وخالي من الروائح.
مقترح
تسوق
خلّي السعادة تكمل.. تشتري منين أحلى شوكولاتة في القاهرة؟
أفضل أنواع الشوكولاتة أماكن بيع شوكولاتةـ محلات شوكولاتة +3
الحياة في كايرو
