The Definitive Guide to Living in the Capital , Cairo , Egypt

السن مجرد رقم.. مقولة شهيرة كانت ملهمة للمصري “عز الدين بهادر” اللي بالرغم من إن عمره 75 سنة، إلا إنه صمم يلعب كرة قدم، ومش بس لعب، لأ.. ده يتفوق فيها كمان، وفعلًا شارك في مباراة كرة قدم رسمية، ووقف على أعتاب كتابة التاريخ كأكبر لاعب كرة قدم عرفته اللعبة على الإطلاق.

المباراة الرسمية الأولى لـ “عز” كانت بقميص فريق 6 أكتوبر اللي تعاقد معاه في يناير اللي فات علشان يلعب في مركز الوسط المهاجم، وأدى مباراة رائعة مع فريقه في دوري الدرجة الثالثة المصري، وسجل فيها هدف مميز.

قناة سكاي نيوز عربية، بتقول إن “عز” بيستعد لدخول موسوعة “جينيس” للأرقام القياسية كأكبر لاعب كرة قدم في التاريخ، وده في حالة إنه ينجح في لعب مباراتين متتاليتين كاملتين، وبما إنه انتهى من المباراة الأولى، فكدة ناقص له مباراة واحدة تانية ويدخل لـ”جينيس”.

نظرًا لظروف سنه ولياقته.. “عز” ليه برنامج تدريب بدني خاص، بحسب المدير الفني للفريق “أحمد عبد الغني” اللاعب السابق لمنتخب مصر.

وإحنا في “كايرو 360” بنتمنى كل التوفيق لعز الدين بهادر، اللي أثبت إن النجاح ممكن يكون في أي سن.