The Definitive Guide to Living in the Capital , Cairo , Egypt

اللقاح المضاد لفيروس كورونا المستجد (كوفيد 19) هو الأمل الوحيد للعودة للحياة الطبيعية من جديد، علشان كده بنشجع الجميع يقدموا عليه في أسرع وقت.. ومن ناحيتها أعلنت وزارة الصحة عن خدمة جديدة ومهمة، وهي خدمة اللقاح المنزلي للأشخاص غير القادرين على التوجه لمراكز التطعيم.. تعالوا نعرف الشروط وطريقة طلب الخدمة دي مع بعض:

فريق كايرو 360 تواصل مع مدير مكتب مساعد وزير الصحة رامي جلال، علشان نفهم منه تفاصيل الخدمة الجديدة، وقال لنا إن “الصحة” أطلقت بالفعل خدمة اللقاح المنزلي للأشخاص غير القادرين على التوجه لمراكز التطعيم، زي المصابين بالشلل.

وشرح لنا “جلال” إن طلب الخدمة سهل جدًا، كل اللي مطلوب من الشخص التسجيل على الموقع الرسمي للقاح، وهو الموقع اللي عملته وزارة الصحة، وبعد التسجيل يتصل الشخص بالخط الساخن 15335، ويشرح للموظف حالته الصحية، والوزارة هتحدد بعد كده إذا كان مؤهل للحصول على اللقاح المنزلي ولا لأ.

طيب إزاي تسجلوا على الموقع؟

تقدروا تسجلوا على موقع لقاح كورونا التابع لوزارة الصحة والسكان من هنــــــــــا، وبعدها بيدخل المواطن البيانات التعريفية زي الاسم والرقم القومي وبيانات التواصل زي رقم الهاتف، وبيستقبل المواطن رمز التحقق للتأكد من صحة الرقم، وبعدها بيتم تحديد المحافظة التابع لها وأقرب وحدة صحية بيرغب في الحصول على اللقاح فيها.

أما بالنسبة للعاملين بالقطاع الطبي فيتم تحديد الوظيفة وتحديد بيانات مكان العمل، وبيتم تحديد الأمراض المزمنة للمرضى والعلاج اللي بيتلقاه المريض، وإدارج تقرير معاه.

وبعدها بيتم إدراج صورة الرقم القومي أو جواز السفر وصور لأي تقارير طبية، ثم بيقوم المواطن بالموافقة على إقرار البيانات وتلقي اللقاح، وبيتم إعطاء رقم بيتم من خلاله متابعة حالة الطلب، كمان تقدروا تتابعوا طلب تسجيل اللقاح أو تلقي الاستفسارات من خلال الخط الساخن 15335.

وتقدروا من هنا تعرفوا أماكن مراكز تلقي لقاحات كورونا في القاهرة الكبرى (مع رابط وطريقة التسجيل)