The Definitive Guide to Living in the Capital , Cairo , Egypt

مافيش شك إننا بنعيش فترة صعبة، سواء من حيث أخبار الحروب اللي مابقتش بتفارق القنوات الإخبارية، أو الظروف الاقتصادية الصعبة اللي بيعيشها عالمنا كله وبرضه بسبب الحروب. وفي العصر ده، بنكون محتاجين طبيب نفسي، لكن أسعار الأطباء النفسيين غالية جدًا! علشان كدة هنعرفكم على مجموعة من المستشفيات والعيادات والمنصات الإلكترونية اللي بتقدم خدمات العلاج النفسي بشكل مجاني أو بأسعار رمزية.

 

مستشفى العباسية

شيل من عقلك إنها مستشفى للمجانين زي ما أفلام السينما روجت! دي أكبر مستشفى للأمراض النفسية في مصر وفيها أقسام نفسية وعصبية وعلاج إدمان مخدرات وإقلاع عن التدخين وأكثر. الكشف في المستشفى علشان تشخيص الحالة بـ1 جنيه بس، والمواعيد هناك من 9 صباحًا حتى 12 ظهرًا يوميًا. وممكن التواصل عن طريق التليفون: 022616255 والعنوان  في 1 شارع صلاح سالم بجوار أرض المعارض – مدينة نصر – القاهرة.

 

منصة الصحة للعلاج النفسي وعلاج الإدمان

منصة مهمة جدًا، وللأسف مش معروفة كويس، بتقدم استشارات ودعم نفسي في خصوصية وسرية تامة، وبتهدف لمحاربة الوصم المتعلق بالاضطرابات النفسية في المجتمع.

رابط المنصة (هنا).

مستشفى الدمرداش

مستشفى الدمرداش فيها مركز متخصص للطب النفسي والكشف فيه بسعر رمزي، وكمان بيصرفوا علاج مجاني وعندهم غرف حجز وتأهيل للحالات، ولكل مريض كارت متابعة بيستمر معاه طوال رحلة العلاج، ومواعيدهم من الأحد للأربعاء من 9 صباحًا حتى 2 مساءً وباقي الأيام شغالين 24 ساعة. والعنوان في شارع رمسيس بجوار مسجد النور بالعباسية.

 

مستشفى مصر الجديدة للصحة النفسية

مستشفى مهمة في القاهرة، فيها قسم لتأهيل المتعافين من الإدمان مجانًا، وكمان فيها علاج بسعر رمزي في العيادات الخارجية للصحة النفسية، وفيه كمان احتجاز لو الحالة احتاجت ده، سواء مجانًا أو بأسعار خاصة للقسم الاقتصادي، ومواعيدهم يوميًا من 9 صباحًا حتى 1:30 ظهرًا، طوال أيام الأسبوع ماعدا الجمعة. وعنوانها في طريق المطار – بجوار الجمع الإداري لمصر الطيران.

 

قسم الطب النفسي بالقصر العيني

المستشفى فيها أقسام مختلفة للطب النفسي، وبيقدموا علاج مجاني كمان، والمواعيد من 8 صباحا ل12 ظهرًا ماعدا الأحد من 8 صباحًا لـ10 صباحًا.. وعندهم كمان طواريء طب نفسي للحالات الطارئة وده موجود 24 ساعة.