The Definitive Guide to Living in the Capital , Cairo , Egypt

نسايم “شم النسيم” بدأت تهل علينا، بروايحها اللي كتير مننا بيميزها بروايح الفسيخ والرنجة، اللي بتعتبر الأكلة الرسمية والشعبية للمناسبة دي، واللي بتبقى منتشره بشكل واسع جدًا في أوساط الأُسر المصرية بجميع مستوياتها الاقتصادية، على الرغم من التحذيرات اللي بتطلع كل سنة في نفس المعاد ده من خطورة تناول الأسماك المملحة أو المدخنة.

كتير مننا مش بيقدر يقاوم أكلة فسيخ أو رنجة مع العيلة، ولذلك كان في شوية تعليمات لازم تاخد بالك منها أثناء أو بعد أكل الفسيخ أو الرنجة، لكن موقع “الكونسلتو” الطبي نشر تقرير، استند على تحذيرات من الدكتور “محمد نبيل يوسف” أستاذ الكبد والجهاز الهضمي في كلية طب القصر العيني، قال فيها إن في أشخاص للأسف ممنوعين نهائيًا وبشكل تام من أكل الرنجة أو الفسيخ أو الملوحة في شم النسيم، وهما:

1- مرضى القلب:

يمنع مريض القلب بشكل كامل عن أكل النوع ده من الأسماك، لإنها ببساطة فيها كميات كبيرة من الملح، وزيادة الأملاح في الجسم هتعمل احتباس للمياه اللي في الجسم، وبالتالي تورم في الرجلين وارتشاح الغشاء البلوري على الرئتين، وده هيؤدي بدوره لضعف عضلة القلب.

2- مرضى الضغط العالي:

الأستاذ “سيد حماد” أستاذ التغذية العلاجية في المعهد القومي للتغذية، بيقول إن الرنجة والفسيخ فيهم نسبة عالية من الصوديوم والبوتاسيوم، وده بيرفع ضغط الدم بشكل كبير، والضغط العالي ده ممكن يتسبب في نزيف في المخ وفشل في عضلات القلب.

3- مرضى الكبد:

اللي عندهم أي نوع من أنواع الالتهاب الكبدي، أكل الأسماك المملحة دي “سواء فسيخ أو رنجه” في شم النسيم هيتسبب في تدهور حالتهم بصورة كبيرة جدًا.

4- مرضى الكلى:

أكل الأسماك المملحة بيعمل احتباس للبول، وده خطر جدًا على مرضى التهابات الكلى أو الفشل الكلوي.

5- الحمل:

الرنجة والفسيخ بيرفعوا ضغط الدم بسبب كمية الصوديوم والبوتاسيوم اللي فيهم زي ما قولنا قبل كده، وبالتالي الكميات العالية من الصوديوم والبوتاسيوم دي بيكون ليها تأثير ومضاعفات كبيرة جدًا على الجنين، ممكن توصل للإجهاض أو ولادة طفل حجمه صغير، أو عنده تشوهات وعيوب خلقية.

6- الأطفال:

الأطفال كمان من ضمن الفئات اللي مش المفروض إنها تاكل فسيخ أو رنجه، وده بسبب كمية الأملاح الكبيرة جدًا اللي فيهم، علشان كده ده ممكن يعرض الأطفال لخطر التسمم بنسبة مش بسيطة.