بدل ما تأنتخ في البيت.. نصائح عملية للتخلص من “التخمة” بعد الفطار
الإفطار الصحي الانتفاخ الهضم في رمضان تخمة تمارين جنزبيل عصير ليمون بالنعناع علاج التخمة ليمون مشاكل الأكل نصائح صحية نعناع
Cairo 360
رمضان شهر كريم مليان خير ولمة العيلة والصحاب والمعارف لكن للأسف بسبب العطش والجوع طول اليوم، فبمجرد ما بنبدأ أكل بيحصل هجوم وتحصل معركة دموية داخل المعدة لأن الأكل بينزل عليها مرة واحدة وده للأسف بيسبب الإنتفاخ والتخمة، وعلشان تقضي رمضانك خفيف تقدر تعمل فيه اللي أنت عاوزه وتتحرك بعد الفطار زي ما تحب. جمعنا لك أفضل النصائح اللي تساعدك أنك تعمل ده.
أول ما تحس بالتخمة وقف أكل فورًا وارتاح شوية
لو حسيت بالتخمة وأنت بتاكل ننصحك أنك توقف أكل فورًا وتبدأ تمضغ بالراحة اللي أكلته، ما تكملش أكل أبدًا لما بطنك تبدأ تتملي وتوجعك وخد راحة فترة لحد ما معدتك تهضم وتبدأ تستوعب اللي أنت حطيته فيها.
ولو عاوز تتجنب المشكلة دي من البداية يا ريت تقسم الأكل على مراحل، أول مرحلة أنك تبدأ بالتمر والمياه أو الشوربة علشان تمهد لمعدتك أنك بدأت تاكل، والمرحلة التانية تبدأ بالراحة وببطء في أكل الوجبة الرئيسية.
اشرب مياه كتير بس بالراحة
شرب المياه هيساعدك في حاجات كتيير منها أنك تهضم الأكل كويس، ده غير أنه هيساعدك تحافظ على رطوبة جسمك، وبالتالي منع جفاف الفم وإفراز اللعاب بكميات مناسبة.
وعادة حاول تشرب المياة بعد 20 دقيقة تقريبًا من بعد ما تبدأ تاكل، وشرب المياة يكون بالتدريج مش مرة واحدة بكميات كبيرة.
اهضم بعصير ليمون بالنعناع
الليمون والنعناع من المشروبات المفيدة وبشكل خاص في رمضان علشان هي بتساعد في عملية الهضم وإراحة الجهاز الهضمي وتهدئة المعدة وعلاج اضطراباتها. ده غير إنها غنية بمضادات الأكسدة والعناصر اللي بتعزز المناعة وتحمي من الالتهابات وتكافح الميكروبات.
وكمان بتساهم في طرد الغازات وعلاج التخمة. علشان كده هيكون مفيد جدًا أنك تشرب عصير الليمون والنعناع، أو تشرب شاي النعناع مع الليمون في رمضان.
ممارسة رياضة خفيفة
بعد الوجبة الدسمة دي بساعتين على الأقل يا ريت تتحرك شوية وتبدأ في ممارسة نشاط بدني خفيف، زي المشي أو تمارين البطن اللي بتساعد على تعزيز حركة الدورة الدموية وعمل الجهاز الهضمي.
اسمع الأنزيمات الهاضمة بتقولك إيه؟!
عادة الجسم بينتج بشكل طبيعي مجموعة من الأنزيمات الهاضمة اللي بتكون وظيفتها هي السيطرة على عمليات الهضم. لكن في رمضان ممكن تعطل شوية بسبب التخمة فلازم تركز معاها. والتخمة دي بتكون نتيجة بعض العادات السلبية زي أنك بتاكل كل حاجة مرة واحدة في وقت قصير، وده بيخلي الأنزيمات الهاضمة خارج السيطرة.
وهنا بقى لازم يا بطل تروح للدكتور وتطلب المساعدة من خلال أنك تاخد أنزيمات هاضمة على شكل مكمل ممكن يساعد في عملية الهضم وتخفيف التلبكات وآلام المعدة. زي أنزيم اللاكتاز Lactase المتخصص في هضم اللاكتوز، وهو بروتين موجود في اللبن ومنتجاته. وأنزيم الليباز Lipase، والمتخصص في هضم الدهون.
نتمنى أنك تبقى خفيف طول الشهر الكريم وتستمتع فيه بكل دقيقة من غير إحساس بالتقل أو التخمة.
اعتمد المقال على معلومات طبية من موقع ويب طب.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
