The Definitive Guide to Living in the Capital , Cairo , Egypt

يوم الأحد القادم 28 فبراير 2021 هتبدأ مصر خطوة مهمة هتساعدها على الانتصار في حربها مع فيروس كورونا المستجد (كوفيد 19). والخطوة دي هي فتح باب التسجيل للحصول على لقاح كورونا بشكل مجاني لكل المصريين وللأجانب اللي عايشين على أرض مصر، وده بعد ما الدولة قربت تنتهي من تطعيم الأطباء.

وبحسب تصريحات إعلامية للمستشار نادر سعد المتحدث باسم مجلس الوزراء، الوضع في مصر مطمئن بخصوص كورونا، وفيه ثبات نسبي في أعداد الإصابات بالفيروس.

وأضاف “سعد” إن “الموجودين في مصر من جنسيات ثانية هيكون لهم حق التسجيل من أجل الحصول على لقاح كورونا”.

وكشف “سعد” أن الدولة هتقوم بتطعيم غير المصريين بلقاح كورونا، وأن القادرين بس هم اللي هيدفعوا ثمن اللقاح واللي هيكون حوالي 200 جنيه.

وأشار “سعد” إلى أن النظام المميكن هو اللي هيحدد أولوية الحصول على لقاح فيروس كورونا بحسب السن ووجود أمراض مزمنة.

ووضح نادر سعد إن النظام المميكن هيطلب خلال التسجيل أي تقارير مستحدثة بتثبت إصابة الشخص بالأمراض المزمنة عبر صفحة التسجيل، وطلب من أصحاب الأمراض المزمنة إضافة الأوراق اللي بتثبت ده، زي قرار على نفقة الدولة.

وعن موعد بدء تطعيم لقاحات كورونا، قال نادر سعد إن ده مرتبط بوصول 8.6 مليون من لقاحات كورونا تعاقدت عليها مصر مع التحالف الدولي للقاحات، وأضاف أنه من المقرر وصول أول الشحنات دي بداية من نهاية الشهر الجاري.