The Definitive Guide to Living in the Capital , Cairo , Egypt

سواء كنت طالب أو بتشتغل فأكيد السوشيال ميديا بقت جزء مهم من حياتك، والسبب في إن وقت كتير مننا بيضيع على الفاضي، سواء على اليوتيوب أو فيسبوك أو إنستجرام، فلازم تحسب أنت بتضيع وقت قد إيه من يومك علشان تعرف إذا كنت مدمن سوشيال ميديا ولا لأ، ولو لاقيت أنك بقضي أكتر من ساعتين في اليوم عليها يبقى لازم تاخد وقفة.

وفي السطور الجاية هنقول لكم على شوية نصائح هتساعدك تخفف من إدمانك للسوشيال ميديا شوية.

 

عطل الفيسبوك أو شيل تطبيقه من الموبايل

ممكن تختار خاصية في الفيس بوك أنك تعمل الحساب بتاعك غير فعال،  وده بيكون بشكل مؤقت للبعد عن الدوشة والرغي والمشي مع التريند الجديد، ودي حاجات هتعطلك سواء في دراستك أو حياتك. ولو عاوز تكلم أصحابك ممكن تكتفي بالماسنجر أو واتس آب.

عطل كل الإشعارات في تليفونك

الإخطارات أو الإشعارات اللى بتوصلك من التطبيقات المختلفة هى اللى بتخليك بشكل أساسى ماسك الموبايل في إيدك وبتشوف الجديد، علشان كده ممكن تختار من الإعدادات تعطيل كل الإشعارات من كل التطبيقات اللي عندك.

اختار مواقع مفيدة

شوف مواقع تعليمية على الإنترنت أو اللي مخصصة لتنمية مهارات محددة علشان تقضي وقتك وأنت بتستفيد وتعمل حاجة مميزة بدل إدمان مواقع التواصل الاجتماعى، وبقى فيه عدد كبير من التطبيقات المخصصة لتعليم اللغات وتنمية الذاكرة وتدريب العقل.

مستقبلك مهدد

لو صدقت حقيقية إن السوشيل ميديا بتهدد مستقبلك ده هيخليك تتعامل معاها بحزم، يعني مثلًا مهم تبقى عارف إنك لو مذاكرتش كويس أو عملت الشغل اللي مطلوب منك على أكمل وجه ده أمر فيه تهديد حقيقي لمستقبلك وبالتالي لازم ما تسمحش للسوشيل ميديا تعطلك عن النجاح.

استعين بمتخصص

لو لقيت نفسك وصلت لمرحلة مرضية ومش قادر تتحكم في نفسك والسوشيل ميديا واخدة كل وقتك لازم تستعين بمعالج نفسي أو متخصص في علاج الإدمان علشان يقف معاك ويساعدك، ده مش عيب على فكرة.