The Definitive Guide to Living in the Capital , Cairo , Egypt

كتير مننا بيتعرض الفترة دي لمرض شائع اسمه اكتئاب الشتاء، وده جزء رئيسي بيخلي بعضنا يفقد متعته بالجو المنعش والأمطار وجمالها، وبكده بندخل في مود مش كويس بيؤدي إلى الحزن والوحدة وغيرهم، وعلشان صحتك النفسية مهمة هنقولك في السطور الجاية على مجموعة من النصائح اللي هتخلصك من اكتئاب الشتاء طبقًا لمقال نشرته مجلة “فرويندين” الألمانية.

ممارسة الرياضة

طبعًا مش سهل على كتير مننا يصحى الصبح بدري ويمارس رياضة قبل الشغل أو الدراسة، لكن لو جربتم الموضوع ده هتحبوه جدًا، وهيغير حياتكم فعلًا، والأمر ده هيساعد في تقليل التوتر، وكمان جسمكم تلقائي هيفرز هرمونات سعادة، هتعدلكم مزاجكم وده بسبب استنشاق الأكسجين النقي الصبح بدري.

قابلوا أصدقاءكم

طبعًا في الشتاء كله بينعزل، لكن لو خرجتم وقابلتم أصحابكم بره البيت والشغل، هتحسوا براحة نفسية وسعادة كاملة، بس معلش اختاروا أصحاب إيجابيين، وبلاش تختاروا عم ضياء في الخروجات.

جربوا حاجات جديدة

شوفوا حاجات جديدة واعملوها، لأن التجارب الجديدة مهما كانت بسيطة هتديكم شعور بالمتعة.

نظموا نومكم

كلنا طبعًا بنقوم بالعافية من على السرير في الشتاء، لكن النوم الكتير بيزود الاكتئاب عند الإنسان، ولازم تنظموا وقتكم في النوم، ولازم تصحوا بدري الصبح علشان تشعروا بمعتة الجو الشتوي الجميل وتزيدوا من هيرمون السعادة في جسمكم.